काठमाडौँ : कात्तिक १८ मा बसेको मन्त्रिपरिषद्ले तत्कालीन प्रहरी महानिरीक्षक दानबहादुर कार्कीको जिम्मेवारी खोस्यो । आईजीपीबाट हटाएर उनलाई नयाँ जिम्मेवारीमा खटाउने निर्णय मन्त्रिपरिषद्ले गरेको थियो ।३३ औँ प्रहरी महानिरीक्षक कार्कीलाई सरकारले प्रधानमन्त्री बालेन्द्र शाहको विशेष सुरक्षा सल्लाहकारको जिम्मेवारीमा खटाउने निर्णय गरेको थियो । सो निर्णयविरुद्ध कार्की भोलिपल्टै सर्वोच्च अदालत गए ।नयाँ आईजीपीमा नियुक्त भएका डा.मनोज केसीले फुली लगाएर प्रहरीको कमान्ड सम्हालेका छन् । तर, विशेष सुरक्षा सल्लाहकारको जिम्मेवारीमा खटाइएका कार्कीले नयाँ जिम्मेवारी पाएको पत्र बुझेका छैनन् । प्रधानमन्त्री तथा मन्त्रिपरिषद्को कार्यालयका एक जना उच्च अधिकृतका अनुसार कार्कीले अहिलेसम्म पत्र नबुझेका हुन् । यसबारे प्रतिक्रिया लिन खोज्दा कार्की सम्पर्कमा आउन चाहेनन् ।
मन्त्रिपरिषद्ले विशेष सुरक्षा सल्लाहकारको नयाँ पद सिर्जना गरेर उनको दरबन्दी सिंहदरबार स्थित प्रधानमन्त्री तथा मन्त्रिपरिषद्को कार्यालयमा रहने निर्णय गरेको थियो । आफूलाई आईजीपीको जिम्मेवारीबाट सरुवा गर्ने निर्णय गैरकानुनी रहेको भन्दै कार्की सर्वोच्च गएका हुन् । उनले दायर गरेको रिटमाथि कार्तिक ३० मा पहिलो सुनुवाइ हुँदैछ ।यसअघि चलाइरहेको मोबाइल नम्बर कार्कीले चलाउन छाडेको उनी निकटस्थहरू बताउँछन् । सरकारको निर्णय विरुद्ध कानुनी लडाईंमा रहेका कार्कीलाई प्रधानमन्त्री तथा मन्त्रिपरिषद्को कार्यालयमा नयाँ कार्यकक्ष तयार गरिएको छ ।
विशेष सुरक्षा सल्लाहकार बस्ने कार्यकक्ष तयार रहेको प्रधानमन्त्री तथा मन्त्रिपरिषद्को कार्यालयका एक जना अधिकृतले बताए । उनले भने, ‘कोठा नम्बर २०७ मा उहाँको लागी कार्यकक्ष तयार छ ।’ प्रधानमन्त्री बालेन्द्र शाहको कार्यकक्ष रहेकै तलामा कार्कीको नेमप्लेट सहितको कोठा तयार गरिएको छ ।प्रधानमन्त्रीको विशेष सुरक्षा सल्लाहकार कार्कीले सरकारको सचिवसरह सुविधा पाउँछन् । सरकारका सचिवलाई आफ्नै कर्यकक्ष, सवारी साधन र चालक पनि उपलब्ध गराउने गरिन्छ । कार्कीले सोही सुविधा पाउने प्रधानमन्त्री कार्यालयका अधिकारीहरू बताउँछन् ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
