Logo

Nov 18 2026 | २०८३, मंसिर ३गते

इलाम अस्पतालमा अत्याधुनिक आकस्मिक कक्ष बन्दै

इलाम अस्पतालमा अत्याधुनिक आकस्मिक कक्ष बन्दै

इलाम : इलाम नगरपालिकास्थित इलाम अस्पतालको सेवालाई थप प्रभावकारी बनाउन नयाँ आकस्मिक कक्ष (इमर्जेन्सी ब्लक) निर्माण प्रक्रिया सुरु भएको छ। कोशी प्रदेशको इलाम नगरपालिका वडा नम्बर ७ मा निर्माण हुन लागेको यस नयाँ भवनको शुक्रबार एक विशेष समारोहबिच संयुक्त रूपमा शिलान्यास गरिएको हो।

काठमाडौँस्थित भारतीय दूतावासकी काउन्सिलर गीताञ्जली ब्रान्डन र इलाम नगरपालिकाका मेयर केदार थापाले संयुक्त रूपमा जगको ढुङ्गा राखेर निर्माण कार्यको शुभारम्भ गरे। भारत सरकारको आर्थिक सहयोगमा निर्माण हुन लागेको यस परियोजनाले इलाम र वरपरका क्षेत्रका बासिन्दाका लागि स्वास्थ्य सेवामा सहज पहुँच पुर्‍याउने विश्वास गरिएको छ।

इलाम अस्पतालको यो नयाँ आकस्मिक कक्ष भारत सरकारको करिब ९ करोड ४० लाख नेपाली रुपैयाँ आर्थिक सहयोगमा निर्माण हुन लागेको हो। यस परियोजनालाई उच्च प्रभाव सामुदायिक विकास आयोजनाअन्तर्गत राखिएको छ, जसको कार्यान्वयन र रेखदेख इलाम नगरपालिकाले नै गर्नेछ। आधुनिक उपकरण र पर्याप्त सुविधासहितको यस ब्लकले अस्पतालको सेवा प्रवाहमा ठूलो परिवर्तन ल्याउने अपेक्षा छ।

शिलान्यास कार्यक्रममा मेयर केदार थापा तथा अन्य सरोकारवालाहरूले स्वास्थ्य क्षेत्रमा भारतले पुर्‍याएको यस महत्वपूर्ण सहयोगको प्रशंसा गरे। मेयर थापाले नयाँ सुविधाले नगरवासी र जिल्लाका अन्य बिरामीहरूलाई आकस्मिक उपचारका लागि बाहिर जानुपर्ने बाध्यता कम गर्ने बताए। भारत र नेपालबीचको बहुआयामिक र घनिष्ठ छिमेकी सम्बन्धको चर्चा गर्दै दूतावासकी प्रतिनिधि ब्रान्डनले नेपाल सरकारको विकासका प्राथमिकताहरूमा सहयोग गर्न भारत सधैँ तत्पर रहेको उल्लेख गरिन्।

प्रतिक्रिया दिनुहोस
सम्बन्धित समाचार

© 2026 All right reserved to saurahaonline.com | Site By : Sobij

© 2026 All right reserved to saurahaonline.com | Site By : Sobij

नयाँ अपडेट