काठमाडौँ : नेकपा एमालेका नेताहरूको कार्यविभाजनलाई अन्तिम रूप दिनका लागि पार्टी केन्द्रीय सचिवालयको बैठक आज बस्दैछ। पार्टी अध्यक्ष केपी शर्मा ओलीले गत जेठ ५ गतेको बैठकमा पेस गरेको नेताहरूको कार्यविभाजन सम्बन्धी प्रस्तावलाई आजको बैठकबाट परिमार्जनसहित अनुमोदन गर्ने तयारी गरिएको छ। एमाले केन्द्रीय कार्यालय सचिव डा. भीष्म अधिकारीका अनुसार बैठक बिहान ११:३० बजे अध्यक्ष ओलीको निवास भक्तपुरको गुण्डुमा बस्ने तय भएको छ।
अध्यक्ष ओलीको प्रस्तावमा नेताहरूको जिम्मेवारी हेरफेर गर्ने विषय समेटिएको छ। सचिवालय बैठकमा सो प्रस्तावमाथि विस्तृत छलफल गरी कार्यविभाजनलाई अन्तिम रूप दिइने र त्यसलाई तत्कालै अन्तरपार्टी निर्देशन (अपानि) मार्फत तल्ला कमिटी र नेताहरू समक्ष पठाइने पार्टी स्रोतले जनाएको छ।
गत मंसिर २७ देखि २९ गतेसम्म सम्पन्न भएको एमालेको ११ औँ महाधिवेशनपछि नेताहरूको अस्थायी कार्यविभाजन मात्र गरिएको थियो। त्यसबेला फागुन २१ गतेको निर्वाचनलाई केन्द्रित गरेर काम गर्नका लागि केन्द्रीय सदस्य तथा पदाधिकारीहरूलाई जिम्मेवारी तोकिएको थियो भने यस पटक स्थायी रूपमा कार्यविभाजन गर्न लागिएको हो।यस पटकको नयाँ कार्यविभाजनमा एमालेका मुख्य मानिने विभागहरूको जिम्मेवारीमा ठुलो हेरफेरको प्रस्ताव गरिएको छ। जसअनुसार पार्टी सचिव भानुभक्त ढकाललाई संगठन विभाग, केन्द्रीय सदस्य शेरबहादुर तामाङलाई स्कूल विभाग, विशाल भट्टराईलाई जनसंगठन समन्वय विभाग र डा. सूर्य पाठकलाई प्रचार तथा प्रकाशन विभागको जिम्मेवारी दिने प्रस्ताव गरिएको छ। पार्टीका उच्च तहका नेताहरू अर्थात् उपाध्यक्ष र उपमहासचिवहरूलाई भने विभिन्न विभागहरूको समन्वय गर्ने तथा अनुगमन गर्ने विशिष्ट जिम्मेवारी सुम्पिने तयारी छ।
एमालेले आगामी स्थानीय तहको निर्वाचनलाई उच्च प्राथमिकतामा राखेको छ। सोही अनुरूप अध्यक्ष ओलीको प्रस्तावमा अधिकांश केन्द्रीय सदस्यहरूलाई ‘मिसन स्थानीय चुनाव’ को कार्यभारसहित जिम्मेवारी तोकिएको एक नेताले जानकारी दिए।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
