Logo

Nov 19 2026 | २०८३, मंसिर ४गते

महाशिवरात्रिमा रातभर जाग्राम: पशुपतिदेखि नागेश्वरसम्म भक्तजनको अभूतपूर्व भीड

महाशिवरात्रिमा रातभर जाग्राम: पशुपतिदेखि नागेश्वरसम्म भक्तजनको अभूतपूर्व भीड

काठमाडौँ : चिसो स्याँठ र कठ्याङ्ग्रिँदो जाडोको प्रवाह नगरी हजारौँ भक्तजनले आइतबार रातभर पशुपतिनाथसहित देशभरका शिवालयमा महाशिवरात्रि मनाएका छन्। बिजुली बत्तीले झिलिमिली बनेको पशुपति क्षेत्रमा आइतबार साँझदेखि सुरु भएको भक्तजनको भीड सोमबार बिहानसम्मै कायमै रह्यो।

भक्तजनको चाप अत्यधिक भएपछि पशुपति क्षेत्र विकास कोषले यो वर्ष रातभर मन्दिरको मूलढोका खुला राखेको थियो। पशुपतिनाथमा आइतबार सूर्यास्तपछि सुरु भएको महाशिवरात्रिको चार प्रहरको पूजा आज बिहान ६ बजे सम्पन्न भयो। विगतका वर्षहरूमा राति १० बजेपछि मूलढोका बन्द गरेर चार प्रहर पूजा गर्ने गरिए पनि यसपालि राति अबेरसम्म भक्तजन लाइनमा बसेकाले ढोका बन्द नगरिएको कोषका सूचना अधिकारी अनिता भट्टले जानकारी दिइन्। पशुपति क्षेत्रमा यस वर्ष लाखौँ भक्तजनले पूजा, आराधना र दर्शन गरेका छन्।

पशुपतिनाथसँगै गोकर्णेश्वर महादेव मन्दिरमा पनि आइतबार रातिसम्म भक्तजनको उत्तिकै भीड लाग्यो। पशुपतिमा श्रीयन्त्र र गोकर्णेश्वरमा बालयन्त्रको पूजा हुने शास्त्रीय मान्यताका कारण धेरै भक्तजन दुवै मन्दिर पुग्ने गर्छन्। भक्तजनको भीडका कारण जम्मा भएको फोहोरलाई आज बिहान वाग्मती सुन्दरता सरोकार मञ्चको नेतृत्वमा सफाइ गरिँदैछ। त्यस्तै, गोठाटारस्थित नागेश्वर महादेव मन्दिरमा पनि आइतबार बिहानैदेखि लागेको भक्तजनको लाम रातिसम्मै उस्तै थियो। नागेश्वरमा ६ जना ब्राह्मणद्वारा चारै प्रहर पूजाआराधना र रुद्राभिषेक सम्पन्न गरियो। महाशिवरात्रिमा बाणेश्वर र नागेश्वरको दर्शन गर्नाले मुद्दामामिलाबाट छुटकारा पाउनुका साथै श्री प्राप्ति हुने धार्मिक विश्वास रहेको मन्दिर व्यवस्थापन समितिका अध्यक्ष प्रकाशजङ्ग रायमाझीले बताए। राजधानीका अन्य शिवालयहरूमा पनि मध्यरातसम्मै भक्तजनको चहलपहल देखिएको थियो।

प्रतिक्रिया दिनुहोस
सम्बन्धित समाचार

© 2026 All right reserved to saurahaonline.com | Site By : Sobij

© 2026 All right reserved to saurahaonline.com | Site By : Sobij

नयाँ अपडेट