चितवनमा दुर्घटनाको उच्च जोखिम रहेका सडक तथा क्षेत्रमा सवारी आवागमन व्यवस्थित बनाउन चितवन प्रहरी र ट्राफिक प्रहरीले प्लास्टिक ट्राफिक बोलार्ड राख्न थालेका छन्। सडकमा राखिएका यी लचकदार पोलले लेन छुट्याउन, सवारीसाधनलाई निश्चित दिशामा सञ्चालन गर्न तथा सडकमा हुने अव्यवस्थित आवागमन नियन्त्रण गर्न सहयोग पुग्ने अपेक्षा गरिएको छ।प्लास्टिक ट्राफिक बोलार्ड (Plastic Traffic Bollard) सडकमा सवारीसाधनको आवागमन व्यवस्थित गर्न, सडकको भाग छुट्याउन, जोखिमपूर्ण क्षेत्र संकेत गर्न तथा अस्थायी ट्राफिक अवरोध सिर्जना गर्न प्रयोग गरिने उपकरण हो। विशेषगरी दुर्घटनाको जोखिम बढी भएका सडक, अव्यवस्थित चोक तथा सवारीसाधनले लेन मिचेर चलाउने क्षेत्रमा यस्ता बोलार्ड राख्दा ट्राफिक व्यवस्थापन सहज हुने गर्दछ।
सडकमा राखिएका लचकदार बोलार्डले चालकलाई आफ्नो लेनमा रहेर सवारी चलाउन सचेत गराउनुका साथै अनावश्यक रूपमा लेन परिवर्तन गर्ने, विपरीत दिशाबाट प्रवेश गर्ने तथा सडकको संरचना मिचेर सवारी चलाउने प्रवृत्तिलाई नियन्त्रण गर्न मद्दत पुर्याउने विश्वास गरिएको छ।पछिल्लो समय जिल्लाका विभिन्न सडक तथा जोखिमपूर्ण क्षेत्रमा यस्ता प्लास्टिक ट्राफिक बोलार्ड राख्ने कार्य भइरहेको छ। यसले सडकमा सवारीसाधनकोआवागमनलाई थप व्यवस्थित बनाउनुका साथै दुर्घटनाको जोखिम न्यूनीकरण र ट्राफिक व्यवस्थापनमा सकारात्मक योगदान पुर्याउने प्रहरीको विश्वास छ।
सडक दुर्घटना न्यूनीकरणका लागि चालकको सचेतना, ट्राफिक नियमको पालना र सडकको उचित व्यवस्थापनसँगै यस्ता प्रविधि तथा उपकरणको प्रयोग पनि प्रभावकारी उपाय बन्न सक्छ। ट्राफिक बोलार्डको उचित प्रयोगले सडकलाई सुरक्षित, व्यवस्थित र सहज आवागमनयोग्य बनाउन थप सहयोग पुग्ने अपेक्षा गरिएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij