कास्की : पोखरा महानगरपालिकाले बजारको मध्यभाग भएर बग्ने फिर्केखोलाको प्राकृतिक बहाव क्षेत्र (खोलाघर) मा रहेका संरचना हटाउने अभियानलाई तीव्रता दिएको छ । यही असोज १५ गतेदेखि सुरु भएको अभियानअन्तर्गत हालसम्म १२ स्थायी र १४ वटा अस्थायी संरचना हटाइएको महानगर प्रमुख धनराज आचार्यले जानकारी दिए ।
गत जेठदेखि सुरु गरिएको खोलाघर खाली गर्ने अभियानअन्तर्गत सम्बन्धित घरधनीलाई आफ्ना संरचना आफैँ खाली तथा हटाउन अन्तिम अवसर दिइएको थियो । सो अवधिमा पनि खाली नभएका वा हटाउन नसकिएका संरचना महानगरपालिकाले अहिले क्रमशः हटाइरहेको हो ।
फिर्के खोलाको खोलाघरभित्र निर्माण भएका संरचना सम्बन्धित व्यक्ति तथा संस्थाले आफैँ हटाउने भनी महानगरपालिकासमक्ष मौखिक सहमति जनाएका थिए तर सहमतिअनुसार संरचना नहटाएपछि महानगरपालिकाले हटाउने कार्य पुनःअघि बढाएको थियो ।
प्रमुख आचार्यले फिर्केखोलाको प्राकृतिक बहाव क्षेत्र संरक्षण र व्यवस्थित सहरी विकासका लागि अभियानलाई निष्कर्षमा पुर्याइने बताए । “खोलाघर संरक्षण पोखराको दीर्घकालीन हितसँग जोडिएको विषय हो । अभियानलाई सफल बनाउन सबैपक्षको सहयोग आवश्यक छ”, उनले भने ।
महानगरका अनुसार खोलाघरभित्र रहेका बाँकी संरचना पनि क्रमशः हटाउँदै गाईघाटसम्म पुगेर अभियान सम्पन्न गरिनेछ । महानगरले अभियान सफल बनाउन नगरवासी, सरोकारवाला तथा सम्बन्धित पक्षलाई सहयोग, समन्वय र सहजीकरणका लागि आग्रह गरेको छ । खोलाको प्राकृतिक बहाव क्षेत्र संरक्षणसँगै बाढी तथा डुबानको जोखिम न्यूनीकरण र व्यवस्थित सहरी विकासमा अभियान महत्वपूर्ण हुने महानगरले जनाएको छ ।
पोखरा महानगरपालिका-१८, २, ४, ५, ७, ८, ६ र १७ भएर बगेर फेवातालमा मिसिने फिर्के खोलाको कुल लम्बाइ आठ किलोमिटर रहेको छ । फिर्के कम्तीमा तीन मिटरदेखि बढीमा ४० मिटरसम्म फराकिलो रहेको पोखरा महानगरले गरेको नापजाँच प्रतिवेदनमा उल्लेख छ ।
फिर्केखोलाको प्राविधिक नाप जाँचपछि यकीन गरिएको खोला घरको पश्चिमतर्फ ३०३ र पूर्वतर्फ २८५ वटा गरी ५८८ सीमास्तम्भ गाडिएका छन् । महानगरले फिर्के खोलाघरभित्रका संरचना हटाएपछि फिर्के करिडोर परियोजना अघि बढाउने योजना बनाएको छ ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
