Logo

Nov 19 2026 | २०८३, मंसिर ४गते

दाइजो प्रथाले मधेस र सिंगो समाजमा पारेको असर अध्ययन गर्न माग

दाइजो प्रथाले मधेस र सिंगो समाजमा पारेको असर अध्ययन गर्न माग

काठमाडौँ : नेपाली कांग्रेसकी सांसद निनुकुमारी कर्णले दाइजो प्रथाले मधेस र सिंगो नेपाली समाजमा पारिरहेको भयावह असरबारे अध्ययन गर्न सरकारसँग माग गरेकी छन् । प्रतिनिधिसभाको बिहीबारको बैठकमा विशेष समयमा सांसद कर्णले भनिन्, ‘म मधेसको छोरी भएर भन्न चाहन्छु, दाइजो प्रथाका कारण समाजमा सिर्जित समस्या अत्यन्तै पीडादायी छ। यो प्रथा मधेसमा मात्र नभई सिंगो मुलुकका लागि एउटा अभिशाप बनेको छ।’

सांसद कर्णले दाइजो लिनु र दिनु दुवै कानुनी रूपमा अपराध भए पनि यो केवल किताबका पानामा मात्र सीमित भएको गुनासो गरिन् । विशेष गरी छोरीहरू जन्मघर त्यागेर जाँदा बोक्नुपर्ने दाइजोको आर्थिक भारले आमाबुबालाई पारेको मानसिक पीडा र वैवाहिक कार्यक्रमका नाममा भइरहेको विकृतिलाई उनले मार्मिक ढङ्गले प्रस्तुत गरिन्।

‘दाइजोकै कारण छोरी चेलीहरूले शारीरिक र मानसिक यातना भोग्नुपरिरहेको छ। विवाहपछि छोरी–चेलीहरू सुरक्षित हुन्छन् कि हुँदैनन् भन्ने चिन्ता हरेक आमाबुबालाई छ,’ उनले भनिन्।
सदनमा उनले जनकपुरको एक जघन्य अपराधको घटनालाई पनि जोडिन्, जहाँ यौनजन्य क्रियाकलापका लागि बालिकाहरूलाई प्रयोग गरिएको थियो।  ‘यस्तो जघन्य अपराध हुनु सुरक्षा निकायको कमजोरी हो,’ उनले भनिन्।
यसका साथै, सांसद कर्णले पछिल्लो समय मधेसका बालबालिकामा लागुऔषधको दुर्व्यसन बढ्दो क्रममा रहेको भन्दै चिन्ता व्यक्त गरिन्। १०–११ वर्षका बालबालिका समेत लागुऔषधको दुष्चक्रमा फसेको भन्दै उनले भनिन्, ‘साना बालबालिका विद्यालय जानुको साटो कुलतमा फसेको देख्दा मन रुन्छ । यसले समाजमा नकारात्मक तथा हिंसात्मक गतिविधि बढाएको छ।’

सांसद कर्णले दाइजो प्रथाको अन्त्य र लागुऔषधको नियन्त्रणका लागि तत्काल कठोर कानुन ल्याउन र सम्बन्धित सबै निकायलाई गृह मन्त्रालयमार्फत निर्देशन दिन सरकारसँग माग गरेकी छन् । उनले भनिन्– ‘दाइजो प्रथा र लागुऔषधजस्ता अपराधविरुद्ध सरकारले कठोर कदम नचाल्ने हो भने भविष्यका कर्णधारहरू नै नष्ट हुनेछन्।’ 

प्रतिक्रिया दिनुहोस
सम्बन्धित समाचार

© 2026 All right reserved to saurahaonline.com | Site By : Sobij

© 2026 All right reserved to saurahaonline.com | Site By : Sobij

नयाँ अपडेट