Logo

Nov 17 2026 | २०८३, मंसिर २गते

स्कुटर अनियन्त्रित भई पुलमा ठोक्किँदा दुई किशोरको मृत्यु

स्कुटर अनियन्त्रित भई पुलमा ठोक्किँदा दुई किशोरको मृत्यु

रौतहट : रौतहटको राजदेवी नगरपालिका- १ मोतिपुरमा स्कुटर अनियन्त्रित भई पुलमा ठोक्किँदा दुई किशोरको मृत्यु भएको छ भने अन्य दुई जना घाइते भएका छन्।झुनखुनवाबाट मोतिपुरतर्फ जाँदै गरेको मधेश प्रदेश ०३–०४२ प १४२९ नम्बरको स्कुटर आज दिउँसो करिब ४ बजे अनियन्त्रित भई पुलमा ठोक्किएको हो।

दुर्घटनामा परी रौतहटको यमुनामाई नगरपालिका–५ जमुआ टोलका १८ वर्षीय अनिकेत पासवान र सोही ठाउँका १६ वर्षीय प्रिन्स पासवानको ज्यान गएको छ। गम्भीर घाइते भएका दुवै जनालाई उपचारका लागि प्रादेशिक अस्पताल गौर पुर्‍याइएकोमा चिकित्सकले दिउँसो ४:३० बजे मृत घोषणा गरेका थिए।

यसैगरी दुर्घटनामा परी यमुनामाई नगरपालिका-५ झुनखुनवा निवासी १५ वर्षीय आकाश पासवान र भारतको सीतामढी जिल्ला भकुरहर ग्राम निवासी १७ वर्षीय सुनिल पासवान घाइते भएका छन्।

घाइतेमध्ये आकाशको प्रादेशिक अस्पताल गौरमा उपचार भइरहेको छ भने टाउकोमा चोट लागेका सुनिललाई प्रारम्भिक उपचारपछि थप उपचारका लागि वीरगञ्ज पठाइएको छ। उपचाररत दुवै घाइतेको अवस्था मध्यम रहेको जनाइएको छ।

प्रहरीले घटनाका सम्बन्धमा आवश्यक थप अनुसन्धान गरिरहेको जनाएको छ।

प्रतिक्रिया दिनुहोस
सम्बन्धित समाचार

© 2026 All right reserved to saurahaonline.com | Site By : Sobij

© 2026 All right reserved to saurahaonline.com | Site By : Sobij

नयाँ अपडेट