Logo

Nov 17 2026 | २०८३, मंसिर २गते

भरतपुर अस्पतालले सीमान्तकृत नागरिकको स्वास्थ्य बिमा शुल्कको १० प्रतिशत तिरिदिने

भरतपुर अस्पतालले सीमान्तकृत नागरिकको स्वास्थ्य बिमा शुल्कको १० प्रतिशत तिरिदिने

चितवन: भरतपुर अस्पतालले गरिब, विपन्न तथा चेपाङ समुदायलगायत सीमान्तकृत वर्गका नागरिकले स्वास्थ्य बिमामार्फत उपचार गराउँदा तिर्नुपर्ने १० प्रतिशत रकम आफैँले बेहोर्ने निर्णय गरेको छ। यो आजदेखि नै लागु भएको अस्पतालका प्रमुख मेडिकल सुपरिटेन्डेन्ट (मेसु) डा. विश्वबन्धु बगालेले जानकारी दिए ।

अस्पताल विकास समितिका अध्यक्ष क्षितिज पौडेलको अध्यक्षतामा आज बसेको समितिको पहिलो बैठकले यस्तो निर्णय गरेको हो। निर्णय कार्यान्वयनमा आएसँगै तोकिएका लक्षित वर्गका बिरामीले स्वास्थ्य बिमामार्फत उपचार गराउँदा तिर्नुपर्ने १० प्रतिशत रकम अस्पतालले बेहोर्नेछ। यसले आर्थिक अभावका कारण उपचारमा कठिनाइ भोगिरहेका नागरिकलाई राहत पुग्ने अपेक्षा गरिएको छ।

स्वास्थ्य बिमामार्फत उपचार गराउँदा बिरामीले बेहोर्नुपर्ने रकमसमेत कतिपय विपन्न परिवारका लागि आर्थिक बोझ बन्ने गरेको छ। यस्तो अवस्थामा अस्पतालले नै उक्त रकम बेहोर्ने निर्णय गर्नुले सीमान्तकृत समुदायका नागरिकको स्वास्थ्य सेवामा पहुँच बढाउन सहयोग पुग्ने देखिन्छ।

अस्पतालको यो निर्णयलाई सामाजिक उत्तरदायित्व र विपन्नमैत्री स्वास्थ्य सेवाको सकारात्मक पहलका रूपमा हेरिएको छ। निर्णयले आर्थिक अवस्था कमजोर भएका नागरिकलाई उपचारका लागि अस्पतालसम्म पुग्न र स्वास्थ्य सेवा लिन सहज वातावरण बनाउन मद्दत गर्ने अपेक्षा गरिएको छ।

अस्पतालका प्रमुख मेडिकल सुपरिटेन्डेन्ट (मेसु) डा. विश्वबन्धु बगालेको पहल तथा सहयोगमा यो निर्णय सम्भव भएको जनाइएको छ। अस्पताल विकास समितिको निर्णयको विभिन्न क्षेत्रबाट स्वागत गरिएको छ।

सीमान्तकृत तथा आर्थिक रूपमा कमजोर नागरिकलाई लक्षित गरी गरिएको यस निर्णयले सरकारी अस्पतालबाट प्रदान गरिने स्वास्थ्य सेवालाई थप समावेशी र पहुँचयोग्य बनाउन सहयोग पुग्ने विश्वास गरिएको छ।

प्रतिक्रिया दिनुहोस
सम्बन्धित समाचार

© 2026 All right reserved to saurahaonline.com | Site By : Sobij

© 2026 All right reserved to saurahaonline.com | Site By : Sobij

नयाँ अपडेट