चितवन: चितवन मेडिकल कलेज (सिएमसी) शिक्षण अस्पतालले बाढी, पहिरो तथा डुबानबाट प्रभावित नागरिकलाई निःशुल्क आकस्मिक स्वास्थ्य सेवा उपलब्ध गराउने भएको छ।

रसुवाको भोटेकोशी नदीमा आएको भीषण बाढीका कारण रसुवा, नुवाकोट, धादिङ, गोरखा, तनहुँ, चितवन, नवलपरासीलगायत नदी तटीय क्षेत्रमा ठूलो जनधनको क्षति भएपछि विपद्को समयमा प्रभावित नागरिकको उपचारमा सहयोग गर्ने उद्देश्यले सिएमसीले यस्तो घोषणा गरेको हो।

कलेजले शुक्रबार जारी गरेको विज्ञप्तिअनुसार बाढीपहिरो तथा डुबानबाट प्रभावित र घाइते नागरिकलाई अस्पतालमा निःशुल्क आकस्मिक स्वास्थ्य परीक्षण, प्राथमिक उपचार तथा आवश्यक परे भर्ना सेवा उपलब्ध गराइनेछ।

विपद्का कारण घाइते तथा प्रभावित नागरिकको उपचारलाई प्राथमिकतामा राख्दै अस्पतालको आकस्मिक कक्ष २४ घण्टा र सातै दिन पूर्ण रूपमा सञ्चालनमा रहने सिएमसीले जनाएको छ।

विपद्को अवस्था हेरी विशेषज्ञ चिकित्सक, नर्सिङ जनशक्ति, एम्बुलेन्स तथा आवश्यक औषधि–उपकरणसहितको छुट्टै आकस्मिक प्रतिकार्य टोली (इमर्जेन्सी रेस्पोन्स टिम) समेत तयारी अवस्थामा राखिएको छ।

आवश्यकता परेको अवस्थामा उक्त टोलीलाई घटनास्थल वा विपद् प्रभावित क्षेत्रमा समेत परिचालन गर्न सकिने सिएमसीका प्रबन्ध निर्देशक प्रताप देवकोटाले बताउनुभयो।

कलेजले विपद् व्यवस्थापन तथा स्वास्थ्य सेवा प्रवाहका लागि नेपाल सरकार, स्वास्थ्य तथा खाद्य स्वच्छता मन्त्रालय, स्थानीय प्रशासन, स्थानीय तह, सुरक्षा निकायलगायत सम्बन्धित सरोकारवाला निकायसँग आवश्यक समन्वय र सहकार्य गर्ने जनाएको छ।

सरकार वा सम्बन्धित सरकारी निकायबाट औपचारिक अनुरोध प्राप्त भएमा चिकित्सक, नर्सिङ स्टाफ, एम्बुलेन्स तथा आवश्यक औषधि–उपकरणसहितको आकस्मिक चिकित्सा टोली जुनसुकै बेला विपद् प्रभावित क्षेत्रमा तत्काल परिचालन गर्न आफू सक्षम र तयार रहेको देवकोटाले बताउनुभयो।

यसैबीच, सिएमसीले बाढीपहिरोका कारण ज्यान गुमाउने सम्पूर्णप्रति श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ। साथै विपद्मा घाइते भएका नागरिकको शीघ्र स्वास्थ्यलाभको कामना गरेको छ।

मनसुनका समयमा चितवनसहित आसपासका जिल्ला बाढी, पहिरो, डुबान तथा अन्य प्राकृतिक विपद्को उच्च जोखिममा रहने भएकाले विपद्को समयमा प्रभावकारी स्वास्थ्य सेवा उपलब्ध गराउनु आफ्नो सामाजिक तथा मानवीय दायित्व भएको सिएमसीले जनाएको छ।

आकस्मिक स्वास्थ्य सहयोग वा विपद् व्यवस्थापनसम्बन्धी समन्वय आवश्यक परेमा सिएमसीका प्रबन्ध निर्देशक प्रताप देवकोटासँग सम्पर्क गर्नसमेत कलेजले आग्रह गरेको छ।