नयाँ दिल्ली  : नीट प्रश्नपत्र चुहावट प्रकरणको विरोध गर्दै तथा केन्द्रीय शिक्षामन्त्री धर्मेन्द्र प्रधानको राजीनामा माग गर्दै आन्दोलनरत विद्यार्थीहरूमाथि प्रहरी कारबाही भएपछि बलिउडका कलाकारहरूले उनीहरूको समर्थनमा खुलेर आवाज उठाएका छन् ।

फिल्म क्षेत्रका अभिनेता, अभिनेत्री तथा गायकहरूले सामाजिक सञ्जालमार्फत विद्यार्थी आन्दोलनप्रति ऐक्यबद्धता जनाएका छन् भने केही कलाकार प्रत्यक्ष रूपमा दिल्ली र मुम्बईमा आयोजित प्रदर्शनमा समेत सहभागी भएका छन् । 

भिनेत्री आलिया भट्ट ले पनि जुलाई २३ मा विद्यार्थीहरूको पक्षमा सामाजिक सञ्जालमा लेखिन्, ‘आफ्नो अडानमा अडिग प्रत्येक विद्यार्थीको पछाडि एउटा सपना, एउटा परिवारको आशा र अनगिन्ती त्यागको यात्रा लुकेको हुन्छ ।’

रघुवीर यादव 

‘पञ्चायत’ सिरिजका अभिनेता रघुवीर यादव ले जुलाई २२ मा इन्स्टाग्राममा भिडियो सन्देश सार्वजनिक गर्दै भने, ‘निर्दोष विद्यार्थीहरूलाई यति निर्दयी रूपमा कुटिएको देखेर म स्तब्ध छु । यदि खाकी पोसाक लगाएका मुख छोपेका मानिसहरूले कसैको आदेशमा विद्यार्थीमाथि कुटपिट गरेका हुन् भने प्रकृतिले उनीहरूलाई कहिल्यै माफ गर्ने छैन । विद्यार्थीहरूको गल्ती के थियो ?’ 

उनले थपे, ‘मेरो सम्पूर्ण साथ विद्यार्थीहरूसँग छ । म उनीहरूलाई सलाम गर्छु ।’

आन्दोलनमा प्रत्यक्ष सहभागी कलाकार

केही कलाकार प्रत्यक्ष रूपमा आन्दोलनमा पनि सहभागी भएका छन् । अभिनेत्री हुमा कुरैशी आफ्ना भाइ तथा अभिनेता साकिब सलीम र अभिनेता रचित सिंहसँग जन्तर–मन्तर पुगेर विद्यार्थीहरूसँग ऐक्यबद्धता जनाइन् । विद्यार्थीहरू २० दिनभन्दा बढी समयदेखि शैक्षिक सुधार र जवाफदेहिताको माग गर्दै आन्दोलनरत छन् । 

उता मुम्बईमा आयोजित प्रदर्शनमा सहभागी भएकी ‘धुरन्धर’ फिल्मकी अभिनेत्री आयशा खान लाई जुलाई २२ मा प्रहरीले नियन्त्रणमा लिएर प्रहरी भ्यानमा राखेको थियो ।

सोनाक्षी सिन्हाको निरन्तर समर्थन

विद्यार्थी आन्दोलनलाई सुरुदेखि नै सामाजिक सञ्जालमार्फत समर्थन गर्दै आएकी अभिनेत्री सोनाक्षी सिन्हा ले पछिल्लो भिडियो सन्देशमा महत्त्वपूर्ण विषयमा आवाज उठाउनु सबैको जिम्मेवारी भएको बताएकी छन् ।

वरिष्ठ कलाकारहरूको पनि समर्थन

वरिष्ठ कलाकार शबाना आजमी, नसिरुद्दिन शाह र प्रकाश राज पनि जन्तर–मन्तर पुगेका थिए । उनीहरूले शैक्षिक सुधारको माग गर्दै अनशन बसेका विद्यार्थीहरूलाई समर्थन जनाएका थिए । अभिनेत्री तथा संयुक्त राष्ट्रसंघकी भारतका लागि वातावरण सद्भावना दूत दिया मिर्जाले सामाजिक सञ्जालमा लेखेकी छन्, ‘लोकतन्त्र त्यतिबेला बलियो हुन्छ, जब असहमतिका आवाज दबाइँदैनन्, बरु सुनिन्छन् । न्याय, करुणा र संयम कमजोरीका होइनन्, समाजको वास्तविक शक्तिका मापदण्ड हुन् ।’ 

रत्ना पाठक शाहले महाभारतको एकलव्य सम्झाइन्

अभिनेत्री रत्ना पाठक शाह ले इन्स्टाग्राममा भिडियो सन्देश पोस्ट गर्दै महाभारतका एकलव्यको प्रसंग उल्लेख गरिन् । उनले प्रश्न गरिन्, ‘के सत्तामा बसेकाहरू केही व्यक्तिको सत्ता जोगाउन विद्यार्थीहरूले आफ्नो भविष्य बलिदान दिनुपर्छ भन्ने अपेक्षा गर्छन् ?’

उनले उक्त पोस्टको शीर्षक ‘आजका एकलव्य’ राखेकी छन् ।

ऋतिक रोशनको भनाइ

अभिनेता ऋतिक रोशन ले जुलाई १८ मै विद्यार्थी आन्दोलनको समर्थन गरेका थिए । ‘सुपर ३०’ फिल्ममा शिक्षकको भूमिका निर्वाह गरेका उनले लेखेका थिए, ‘यो कुरा पूर्ण रूपमा सत्य लाग्छ । एउटा फिल्ममा शिक्षकको भूमिका निभाउँदा विद्यार्थीहरूले भोग्ने मानसिक तनाव र पीडालाई नजिकबाट बुझ्ने अवसर पाएको थिएँ ।’