ललितपुर : ललितपुरको चापागाउँ क्षेत्रमा सम्धी ग्रुप र झ्यालुङ्टार ग्रुपका नाममा गुण्डागर्दी गर्ने १० जनालाई प्रहरीले नियन्त्रणमा लिएको छ।लामो समयदेखि समूह बनाएर हिँड्ने, स्थानीयलाई त्रसित बनाउने र प्राकृतिक स्रोतहरूमा कब्जा जमाएर अवैध असुली गर्ने कार्यमा संलग्न उनीहरूलाई जिल्ला प्रहरी परिसर ललितपुरको टोलीले पक्राउ गरेको हो ।
यी समूहहरूले चापागाउँ र आसपासका रेस्टुरेन्टहरूमा छिरेर खाएको पैसा नतिर्ने, गिटी तथा अन्य प्राकृतिक स्रोतहरूको दोहनमा दादागिरी देखाउने र व्यवसायीहरूबाट हप्तावारी तथा महिनाबारी रकम असुल्ने गरेको प्रहरी अनुसन्धानबाट खुलेको छ। यति मात्र नभई, आफ्नो कर्तव्य पालना गर्न खटिएका प्रहरी टोलीमाथि नै हुलहुज्जत गर्ने र सरकारी काममा अवरोध पुर्याएर उनीहरूले सो क्षेत्रमा सुरक्षा चुनौती थपेका थिए ।
पक्राउ परेकाहरूले समूह बनाएर हिँड्ने र स्थानीयमाझ आतङ्क सिर्जना गर्ने गरेकाले प्रहरीले उनीहरूको पहिचान गरी विशेष अपरेसन चलाएको थियो। जिल्ला प्रहरी परिसर ललितपुरका प्रहरी उपरीक्षक गौतम मिश्रका अनुसार पक्राउ परेका १० जनामाथि थप अनुसन्धान भइरहेको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
