पर्सा : प्रधानमन्त्री कप पुरुष क्रिकेट प्रतियोगिताको उपाधि त्रिभुवन आर्मी क्लबले जितेको छ। वीरगञ्जको नारायणी रङ्गशालामा शुक्रबार भएको फाइनलमा सुदूरपश्चिम प्रदेशलाई पाँच विकेटले पराजित गर्दै त्रिभुवन आर्मी क्लबले उपाधि रक्षा गरेको हो।
फाइनल खेलमा पहिलो व्याटिङ गरेको सृदूरपश्चिम प्रदेशले ३९.४ ओभरमा सबै विकेट गुमाउँदै १६१ रनमा सीमित भएको थियो। सुदूरपश्चिमका अशोक धामीले ४६ बल खेल्दै ४३ रन जोडेका थिए। त्यस्तै किरण ठगुन्नाले ४२ बल खेल्दै ३५ रन जोडेका थिए।
त्यस्तै, सुदूरपश्चिमका नारायण जोशीले ३४ बल खेल्दै २९ रन जोडे। त्रिभुवन आर्मी क्लबका आकाश चन्द र साहाब आलमले सामान तीन–तीन विकेट लिएका थिए। जवाफी ब्याटिङमा उत्रिएको त्रिभुवन आर्मी क्लबले ३४.३ ओभरमा १६४ रन जोड्दै लक्ष्य पछ्याएको हो।
त्रिभुवन आर्मी क्लबका इमरान शेखले ८२ बल खेल्दै ४६ रन जोडे भने बसिर अहमदले पनि ५६ बल खेल्दै ४५ रन जोेडे। सृदूरपश्चिमका हेमन्त धामीले दुई विकेट र अशोक धामीले एक विकेट लिएका थिए।
आजको खेलमा त्रिभुवन आर्मी क्लबका बसिर अहमद प्लेयर अफ दी म्याच घोषित हुँदै पाँच हजार रुपैयाँ पुरस्कार प्राप्त गरे। प्रतियोगितामा प्लेयर अफ दी टुर्नामेन्टबाट लुम्बिनी प्रदेशका सन्तोष यादव बने। उनले प्रतियोगिताभरिमा २६५ रन र २१ विकेट लिएका थिए।
त्यस्तै, वेष्ट बलरबाट सुदूरपश्चिमका हेमन्त जोशी बने। उनले प्रतियोगितामा २५ विकेट लिएका थिए। त्यस्तै वेष्ट ब्याटरबाट गण्डकी प्रदेशका अर्जुन कुमाल बने। उनले प्रतियोगिताभरिमा ५०४ रन जोडेका थिए। इमर्जिङ प्लेयर मधेश प्रदेशका आशिक बैठा घोषित भएका छन्।
प्रतियोगिताको विजेता टोली त्रिभुवन आर्मी क्लबले नगद १० लाख रुपैयाँ, ट्रफी, मेडल र प्रमाणपत्र प्राप्त गर्यो भने उपविजेता बनेको सुदूरपश्चिमले पाँच लाख नगद, ट्रफी, मेडल र प्रमाणपत्र हात पार्यो। प्रतियोगितामा तीन विभागीय टोली नेपाल पुलिस क्लब, त्रिभुवन आर्मी क्लब र नेपाल एपीएफ क्लब र सात प्रदेशका गरी १० टोलीको सहभागिता रहेको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
