सर्लाही : सर्लाहीको लालबन्दी नगरपालिकाले विद्यालय परिसरभित्र विना अनुमति प्रवेश गरी भिडियो बनाउने र अन्तरवार्ता लिने युट्युबरहरूलाई कानुनी कारबाही गर्ने चेतावनी दिएको छ।
नगरपालिकाले एक प्रेस विज्ञप्ति जारी गर्दै केही व्यक्तिहरूले पठनपाठन भइरहेको समयमा विद्यालयमा प्रवेश गरी अनावश्यक रूपमा भिडियो खिच्ने र शिक्षक तथा विद्यार्थीको अन्तरवार्ता लिने गरेको भन्दै यस्तो कार्यप्रति गम्भीर ध्यानाकर्षण भएको जनाएको छ।
सामुदायिक विद्यालयहरूबाट आएको उजुरीका आधारमा नगरपालिकाले यस्तो कदम चालेको हो। नगरपालिकाका अनुसार विद्यालयका प्रधानाध्यापकहरूसँगको छलफलमा यस्ता गतिविधिले शिक्षकहरूको मनोवल गिराएको र शैक्षिक गुणस्तरमा समेत ह्रास ल्याएको निष्कर्ष निकालिएको छ।
नगर प्रमुख वासुदेव अधिकारीद्वारा जारी विज्ञप्तिमा भनिएको छ, 'विना अनुमति र वास्तविक यथार्थ नबुझी भ्रामक रूपमा सामाजिक सञ्जालमा प्रसारण गर्ने कार्यप्रति नगरपालिका आपत्ति जनाउँदछ। यस्ता गैरकानुनी कार्य कानुन बमोजिम दण्डनीय हुने भएकाले त्यस्ता कार्य नगर्न सम्बन्धित पक्षलाई सचेत गराइन्छ।'
नगरपालिकाले विद्यालयको शैक्षिक वातावरणलाई शान्तिपूर्ण र मर्यादित बनाउन सहयोग गरिदिन सबै सरोकारवालाहरूसँग आग्रह समेत गरेको छ। विना अनुमति विद्यालयमा प्रवेश गरी बाधा पुर्याउने जो कोहीलाई पनि मौजुदा कानुन अनुसार कारबाही गरिने नगरपालिकाले स्पष्ट पारेको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
