काठमाडौँ : प्रतिनिधिसभा निर्वाचन नजिकिएका बेलामा नेपाली कांग्रेसका निवर्तमान सभापति शेरबहादुर देउवा तथा देउवा पत्नी कांग्रेस नेतृ डा. आरजु राणा देउवा मुलुक बाहिर छन् । आरजु विगत ५ दिनदेखि दक्षिणी छिमेकी राष्ट्र भारत भ्रमणमा छिन् भने देउवा बुधबार राति स्वास्थ्योपचारको फलोअपका लागि सिंगापुर उडेका छन् ।
गत भदौमा भएको जेनजी आन्दोलनका क्रममा भदौ २४ गते आन्दोलनकारीको आक्रमणमा परेर गम्भीर घाइते भएका देउवा स्वास्थ्योपचारका लागि कात्तिक १० गते सिंगापुर गएका थिए । त्यो बेला १८ दिन उपचार गरेर कात्तिक २८ गते नेपाल फर्किएका देउवा फेरि फलोअपका लागि सिंगापुर उडेको उनी निकट स्रोतले जानकारी दिएको छ ।
यता देउवा पत्नी आरजु भने विभिन्न मठ मन्दिरमा पुजाँआजाका लागि विगत ५ दिनदेखि भारत भ्रमणमा छिन् । उनको भारतको उज्जेनमा अवस्थित महाकालेश्वर मन्दिमा दर्शन गरेको तस्बिर अहिले सामाजिक सञ्जालमा आएको छ । उनी अझै ५ दिनजति भारतमै रहने निकट स्रोतले जानकारी दियो । बाहिर निर्वाचन छल्नका लागि विदेश उडेको चर्चा परिचर्चा भए पनि देउवानिकट स्रोत भने निर्वाचन अघि नै फर्कने तालिका छ ।
देउवा र उनी निकट नेताहरूको असहमतिबीच गत पुस २७ देखि ३० गतेसम्म काठमाडौँमा भएको विशेष महाधिवेशनबाट गगन थापा सभापतिमा चुनिएका थिए । त्यो विशेष महाधिवेशनलाई देउवा, डा. शेखर कोइराला र उनीहरूको समूहले स्वीकारेको छैन । विशेष महाधिवेशन विवाद अहिले सर्वोच्च अदालतमा विचाराधीन छ ।
सर्वोच्चमा विशेष महाधिवेशन विधानसम्मत नभएको भन्दै मुद्दा दायर गरेकाले देउवासहितका नेताहरू चुनावी प्रचारप्रसारमा पनि गएका थिएनन् । अहिले सिंगापुर उडेपछि असहयोग गर्न उठेको रूपमा चर्चा परिचर्चा भइरहेको छ ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
