काठमाडौँ : नेपाली कांग्रेसका सभापति गगनकुमार थापाले आगामी फागुन २१ गते हुने निर्वाचनपछि कांग्रेसको नेतृत्वमा सरकार बने व्यक्तिगत आयकर प्रणालीमा व्यापक हेरफेर गर्ने घोषणा गरेका छन्।
बिहीबार काठमाडौंमा आयोजित पार्टीको चुनावी 'प्रतिज्ञा सभा' लाई सम्बोधन गर्दै उनले मध्यमवर्गीय नागरिकलाई राहत दिन वार्षिक १० लाख रुपैयाँसम्मको आम्दानीमा कुनै पनि कर नलगाउने प्रतिज्ञा गरे। हालको करको सीमालाई पुनरावलोकन गर्दै सर्वसाधारणको हातमा खर्च गर्ने क्षमता बढाउन यस्तो नीति ल्याउन लागिएको उनले स्पष्ट पारे।
सभापति थापाले उच्च दरको करका कारण लगानी र उपभोगमा परेको असरलाई कम गर्न हाल कायम रहेको अधिकतम ३० प्रतिशतको आयकरलाई घटाएर २५ प्रतिशतमा झार्ने योजना सुनाए। नेपाललाई विदेशी लगानीको आकर्षक केन्द्र बनाउन केवल भाषण गरेर मात्र नहुने तर्क गर्दै उनले नीतिगत सुधार र कर प्रणालीको सरलीकरण अनिवार्य रहेको बताए। करका सबै प्रकारका दरहरूलाई झन्झटमुक्त र लगानीमैत्री बनाउनु नै कांग्रेसको मुख्य आर्थिक एजेन्डा रहेको उनको दाबी छ।
आर्थिक सुधारका साथै संविधान कार्यान्वयनका लागि पार्टी पूर्ण रूपमा प्रतिबद्ध रहेको उल्लेख गर्दै थापाले कांग्रेसले अबको सरकार सञ्चालनमा नयाँ आर्थिक मोडल अपनाउने संकेत गरे। उनले करको दायरा बढाउने तर दर घटाउने सिद्धान्तका आधारमा अर्थतन्त्रलाई चलायमान बनाइने बताए। युवा र उद्यमीहरूलाई स्वदेशमै काम गर्ने वातावरण बनाउन र विदेशी लगानीकर्तालाई आकर्षित गर्न यस्ता ठोस कर सुधारका कार्यक्रमहरूले महत्वपूर्ण भूमिका खेल्ने विश्वास उनले व्यक्त गरे।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
