काठमाडौँ : उज्यालो नेपाल पार्टीका अध्यक्ष कुलमान घिसिङले राष्ट्रिय स्वतन्त्र पार्टी (रास्वपा) सँगको एकता प्रयासलाई ‘दुर्घटना’ को संज्ञा दिँदै अब आफ्नो पार्टीको अस्तित्व जोगाएरै अघि बढ्ने उद्घोष गरेका छन्। मंगलबार काठमाडौंमा आयोजित एक कार्यक्रममा बोल्दै घिसिङले अब कुनै पनि हालतमा पार्टीको नाम र चुनाव चिन्ह अरू दलसँग विलय हुन नदिइने स्पष्ट पारेका हुन्।
रास्वपासँगको छोटो समयको एकता प्रयासलाई स्मरण गर्दै घिसिङले त्यो १२ दिनको अवधिलाई पार्टी 'कोमा' मा पुगेको समयका रूपमा टिप्पणी गरे। ‘पार्टी गठन भएको तीन महिना पनि पुगेको छैन, तर हामी बिचमा कोमामा पुग्यौँ,’ उनले भने, ‘अहिले हामी तन्दुरुस्त भएर निस्किएका छौँ, अब हाम्रो नाम र चिन्ह कतै हराउन दिने छैनौँ।’ अन्य दलहरू आफ्नो पार्टीमा समाहित हुन सक्ने तर आफूहरू अरूमा मिसिन नजाने उनले अडान व्यक्त गरे।
आसन्न प्रतिनिधि सभा निर्वाचनमा उज्यालो नेपाल पार्टीका तर्फबाट १२१ जना उम्मेदवार चुनावी मैदानमा रहेको जानकारी दिँदै घिसिङले उनीहरूलाई जिताउन मतदातासँग अपिल समेत गरे। उनले नयाँ भनिएका दलहरूले निर्वाचनमा गरिरहेको तडकभडक र खर्चिलो प्रचारप्रसारप्रति दुःख व्यक्त गर्दै कम खर्चमा चुनाव लड्नुपर्नेमा जोड दिए।
नेपाल विद्युत प्राधिकरणको कार्यकारी निर्देशक हुँदा आफूले लोडसेडिङ अन्त्य गरेर प्राप्त गरेको उपलब्धिलाई उल्लेख गर्दै उनले मुलुकको समग्र विकासका लागि अब राजनीतिक रूपमै 'उज्यालो नेपाल' को विकल्प नभएको दाबी गरे।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
