भरतपुर : चितवनको माटो सधैं बोलिरहन्छ। कहिले परिवर्तनको स्वरमा, कहिले विद्रोहको सङ्केतमा। र, यही माटोबाट फेरि एकपटक एउटा आवाज उठेको छ—शब्द, विचार र प्रतिबद्धताको आवाज।

समाजशास्त्री, मानवशास्त्री तथा वरिष्ठ टेलिभिजन वातावरण पत्रकार भूपेन्द्र बस्नेत चितवन निर्वाचन क्षेत्र नं. ३ बाट संघीय संसद्‌को यात्राका लागि पुनः अग्रसर हुनुभएको छ। यसपटक उहाँको कदम केवल उम्मेदवारी घोषणा होइन, वैकल्पिक राजनीतिप्रतिको पुनः प्रतिबद्धता हो। दुई दशकभन्दा लामो सञ्चार यात्राले बस्नेतलाई समाजका अन्तरकुन्तर चिरफार गरेर हेर्ने दृष्टि दिएको छ।

स्टुडियोका बत्तीमुनि बसेर होइन, गाउँ–बस्तीका आँगन र संघर्षका कथाबाट उहाँले राजनीति बुझ्नुभएको छ। दक्षिण एसियाकै पहिलो सामुदायिक रेडियो रेडियो सगरमाथाको अध्यक्षका रूपमा होस् वा नेपालकै पहिलो सामुदायिक टेलिभिजन बेसो टेलिभिजनको प्रबन्ध निर्देशकका रूपमा—उहाँको यात्रा सधैं ‘आवाजविहीनको आवाज’ बन्ने प्रयत्नमा केन्द्रित रह्यो। “राजनीति सेवा हुनुपर्छ, हस्तक्षेप होइन,” बस्नेत भन्छन्।

दलगत स्वार्थले गाँजिएको समाजमा व्याप्त विकृति र विसंगतिबाट मुक्ति पाउने बाटो वैकल्पिक राजनीतिमै रहेको उहाँको विश्वास छ। चितवन, जसले सधैं परिवर्तनलाई अंगाल्दै आएको छ, फेरि पनि नयाँ प्रयोगको थलो बन्न सक्ने उहाँको ठम्याइ छ। वैकल्पिक राजनीतिको प्रारम्भिक चरणमै विवेकशील साझा पार्टीको स्थापना प्रक्रियामा संलग्न बस्नेतका लागि चुनाव कुनै पहिलो अनुभव होइन।

२०७४ मा चितवन–२ र २०७९ मा चितवन–३ बाट प्रतिस्पर्धा गरिसक्नुभएका उहाँ आगामी २०८२ को निर्वाचनलाई निरन्तरताको कडीका रूपमा हेर्नुहुन्छ—हार–जितभन्दा माथि विचारको यात्रा। यस यात्राको केन्द्रमा छ—पार्वतीपुर। बस्नेतको कल्पनामा पार्वतीपुर केवल एउटा भौगोलिक नाम होइन, ‘नयाँ भरतपुर’को सम्भावनाको मुटु हो। सेन्ट्रल सिटी हो ।

भरतपुर महानगरपालिकाका वडा १४ देखि २८ सम्मलाई समेट्दै यहाँबाट उद्यमशीलता, रोजगारी र गरिखाने संस्कृतिको नयाँ कथा लेख्न सकिने उहाँको विश्वास छ। “युवाले परदेश होइन, आफ्नै माटोमा भविष्य देख्न पाउनुपर्छ,” उहाँको स्वरमा आग्रह छ। जेन–जी आन्दोलनका शहीदप्रति सम्मान व्यक्त गर्दै बस्नेत आजको राजनीतिलाई पुस्तान्तरणको जिम्मेवारीसँग जोड्नुहुन्छ।

उहाँका लागि संसद् सत्ता होइन, उत्तरदायित्व हो; पद होइन, सम्भावना हो। त्यसैले उहाँको उम्मेदवारी नाराभन्दा बढी संवादमा, वाचाभन्दा बढी कर्ममा विश्वास गर्छ। अन्ततः, पार्टीको निर्णयलाई सहर्ष स्वीकार गर्ने प्रतिबद्धतासँगै बस्नेत भन्छन्—उम्मेदवार जोसुकै भए पनि राष्ट्रिय स्वतन्त्र पार्टीको घण्टी चिन्हलाई चितवनमा विजयी बनाउने अभियान नै आफ्नो मुख्य भूमिका हो।

किनकि उहाँका लागि राजनीति व्यक्तिगत यात्रा होइन, सामूहिक सपनाको साझा बाटो हो। चितवनको माटो फेरि बोल्दैछ। प्रश्न एउटै छ—के यो आवाजले ‘नयाँ भरतपुर’को रूप लिनेछ ? सेन्ट्रल सिटी बन्नेछ । त्यो जिम्मेवारी चितवन-३ बासीमा छ ।