सुलीकोट : गोरखाका बेपत्ता एक युवक २० दिनपछि मृत अवस्थामा फेला परेका छन्। सहिद लखन गाउँपालिका – २, मनकामनाका ३५ वर्षीय कालुराम थापा मङ्गलबार बिहान चितवनको देवघाट जङ्गलमा भेटिएका हुन्।
स्थानीय स्रोतका अनुसार, थापा असोज २२ गते मनकामनाको प्रसिद्ध केबुलकारबाट घर फर्किने क्रममा सम्पर्कविहीन भएका थिए। झण्डै २० दिनपछि देवघाटका स्थानीयले जङ्गलमा हिंड्दा उनको शव भेटेपछि प्रहरीलाई खबर गरेका थिए।
मृतकका आफन्त अशोक थापाले बताएअनुसार, प्रहरीले आफन्तसँग सम्पर्क गरी शवलाई कपडाबाट पहिचान गराएपछि पोष्टमार्टमका लागि चितवनको सरकारी अस्पताल पठाइएको छ।
बेपत्ता भएको दिनदेखि परिवार र स्थानीयवासीले विभिन्न स्थानमा खोजीकार्य जारी राखेका थिए। गोरखा र चितवनका प्रहरी कार्यालयमा समेत उजुरी दिइएको थियो। प्रहरीले घटनाबारे थप अनुसन्धान जारी रहेको जनाएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
