बारा : मधेश प्रदेशको सिम्रौनगढ नगरपालिकामा कानुनी प्रक्रिया नमान्ने, मौखिक आदेशमा करोडौंको भुक्तानी गराउने दबाब, र त्यसमा सहमत नभए कुटपिट गर्ने मेयरको प्रवृत्तिले स्थानीय तहको शासन अब 'शाही हुकुम' जस्तै देखिन थालेको छ।
नगरपालिकाका मेयर किशोरीप्रसाद साह कलवारले आफूले आदेश दिएको रकम नछुट्याउँदा प्रमुख प्रशासकीय अधिकृत हरिओम प्रसाद जयसवालमाथि हातपात गरेपछि नगरपालिका संकटमा फसेको छ। १६ वैशाखमा निजी निवासमै बोलाई झपारेको मात्र होइन, उनको घरायसी समर्थकहरूबाट शारीरिक दुर्व्यवहारसमेत भएको जयसवालले बताएका छन्।
विवादको जरो गढीमाई मेलामा खर्च हुनुपर्ने रकम हो। बोर्डले १० लाख छुट्याए पनि मेयरले २७ लाख भुक्तानीको दबाब दिएका थिए। त्यतिमात्र होइन—वृक्षारोपणदेखि समारोह, बाटो सरसफाईसम्मका अनिर्णित शीर्षकमा ७१ लाखभन्दा बढी रकम छिटो-छरितो पार्न दबाब दिइँदै आएको प्रशासकीय अधिकृतको गुनासो छ।
भुक्तानी नमानेपछि भएको कुटपिटले नगरपालिका प्रशासन पक्षघातग्रस्त बनेको छ। सेवाग्राहीहरू सेवा नपाएर फर्किन बाध्य छन् भने कर्मचारीहरूले सम्पूर्ण सेवा बन्द गर्दै दोषीलाई कारबाही नभएसम्म आन्दोलन चर्काउने चेतावनी दिएका छन्।
नगर उपमेयर नजमु सेहरले स्थिति झनै गम्भीर बनाउँदै खुलासा गरिन्—“मेयर कलवार नगरपालिकालाई व्यक्तिगत सम्पत्तिजस्तो ठान्छन्। आफ्नो सन्तान र समर्थकमार्फत अफिसमै कुटपिट, कम्प्युटर तोडफोड, मनपरी कार्यादेश मागजस्ता घटना दोहोरिइरहेका छन्।”
अहिले मेयर कलवार नयाँ प्रशासकीय अधिकृत ल्याउने तयारीमा छन्, तर वर्षको अन्त्य नजिकिँदै गर्दा नयाँ अधिकारीलाई प्रणाली बुझ्नमै समय जाने भएकाले बजेट फ्रिज हुने खतरा औँल्याइएको छ।यति ठूलो सार्वजनिक संकटकाबीच पनि मेयर कलवार सम्पर्कमा आउन अस्वीकार गरेका छन्। यतिबेला नगरपालिकामा सुशासनभन्दा स्वेच्छाचार हावी भएको तस्वीर दिनदिनै स्पष्ट हुँदै गएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
