वन तथा वातावरण मन्त्रालयको सचिवमा डा कँडेल

काठमाडौँ : नेपाल सरकारले वन तथा वातावरण मन्त्रालयको सचिवमा डा पेमनारायण कँडेललाई सरुवा गरेपछि उहाँ आजदेखि मन्त्रालयमा हाजिर हुनुभएको छ । मन्त्रालयका यसअघिका सचिव डा विश्वनाथ ओलीले आफ्नो पदावधि पूरा गरी मङ्गलबार अवकाश पाउनुभएको थियो । सोमबारको मन्त्रिपरिषद् बैठकले डा कँडेललाई वन मन्त्रालयमा सरुवा गर्ने निर्णय गरेको थियो ।

विसं २०४३ मा रेञ्जरबाट सेवा प्रवेश गर्नुभएका डा कँडेल विसं २०५१ मा अधिकृत र विभिन्न जिल्लामा जिल्ला वन अधिकृतको अनुभव हासिल गरी विसं २०६६ मा सहसचिवमा पदोन्नति हुनुभएको थियो । तत्कालीन भूसंरक्षण विभागका महानिर्देशक, वन मन्त्रालयको योजना महाशाखा प्रमुखमा लामो समयको अनुभवपछि डा कँडेलले राष्ट्रपति चुरे तराई–मधेस संरक्षण विकास समितिको सदस्यसचिवमा समेत जिम्मेवारी सम्हालिसक्नुभएको छ ।

प्रदेश नं २ को प्रदेश वन सचिव र राष्ट्रिय निकुञ्ज तथा वन्यजन्तु संरक्षण विभागको महानिर्देशक भई सचिवमा पदोन्नति भएपछि यसअघि उहाँ कृषि तथा पशुपक्षी मन्त्रालयमा करिब साढे चार महिनादेखि कार्यरत हुनुहुन्थ्यो ।   (रासस) 

Promise Education Consultancy