‘अन्तरीक पर्यटकलाई बढावा दिऔँ, सन् २०२२ मा नेपालको पर्यटन दौडिन्छ : पर्यटन मन्त्री भट्टराई (भिडियो)

चितवन संस्कृति, पर्यटन तथा नागरिक उड्ययनमन्त्री योगेशकुमार भट्टराईले आन्तरीक पर्यटकलाई बढावा दिए नेपालमा सन् २०२२ मा पर्यटन क्षेत्र दौडिने बताउनुभएको छ ।
कारोनाका कारण थलिएको पर्यटन विस्तारै उठ्दैछ मन्त्री भट्टराईले भन्नुभयो, सन् २०२१ को मध्यमा उठ्छ र अन्त्यमा दौडन्छ ।

पूर्वी चितवनको पर्यटकीय नगरी सौराहा नजिक रत्ननगर नगरपालिका– ५ जनकौलीमा निर्माण हुन लागेको केटिएम हस्पिटालिटीको ‘द फरेष्ट फ्रन्ट बुटिक रिर्सोट’ नामक होटलको आज शिलन्यास गर्नुहुँदै आन्तरीक पर्यटकलाई प्रासय दिदै पर्यटन क्षेत्र अब विगतको तुलनामा निकै ठुलो फड्को मार्ने विश्वास व्यक्त गर्नुभयो ।


लामो समय घरमा रहनुपरेकाले कोरोना सङ्क्रमण अन्त्यसँगै विदेशी पर्यटक बढ्ने उहाँले उल्लेख गर्नुभयो ।

नेपालीमा मध्यम र माथिल्लो वर्गको महत्वपूर्ण हिस्सा परिवारसहित घुम्न जाने प्रचलन स्थापित भएको उहाँको भनाइ थियो । उहाँले कोरोना सङ्क्रमण घटेसँगै घुम्न नपाएर बसेका नेपालीले स्वदेशी गन्तव्यमा भ्रमण गर्ने बताउनुभयो । अहिले नै महत्वपूर्ण पर्यटकीय गन्तव्यमास्वदेशी पर्यटक आउन थालेको उहाँको भनाइ छ ।

तत्कालै अन्तरराष्ट्रिय क्षेत्रबाट ठूलो अपेक्षा नभएको उल्लेख गर्दै उहाँले भन्नुभयो, “पर्यटकीय गन्तब्य, होटल लगायतमा स्वास्थ्य मापदण्डमा कडाइ गरिएको छ ।” पर्यटकले यहाँको अर्थतन्त्र चलायमान हुने र विश्वलाई चिनाउने मन्त्री भट्टराईको भनाइ थियो ।

श्रम, रोजगार तथा सामाजिक सुरक्षामन्त्री रामेश्वर राय यादवले कोरोना सङ्क्रमणका कारण श्रमबजार तहसनहस भएको बताउनुभयो । उहाँले भन्नुभयो, “विदेशमा गएकाले पनि रोजगारी गुमाएर फर्कनुपर्ने अवस्था आएको छ ।” श्रम बजारमा भएको समस्या अन्त्य गर्नका लागि नेपालमा नै सम्भावनाको खोजी गर्नु आवश्यक रहेको मन्त्री यादवको भनाइ थियो । विदेशबाट रोजगार गुमाएर फर्किएकालाई उत्पादनमूलक क्षेत्रमा लगाउन सरकारले कार्यक्रम ल्याउने तयारी गरिरहेको उहाँले जानकारी दिनुभयो ।

संस्कृतिलाई माटोसँग जोडेर पर्यटनको विकास गर्नसके स्वदेशमा नै रोजगारी सिर्जना हुने उहाँले बताउनुभयो । रोजगारीको खोजीमा विदेशिएका युवाले नेपालमा नै पसिना बगाउनसके विदेश पलायन हुनबाट बचाउन सकिने उल्लेख गर्दै उहाँले भन्नुभयो, “वार्षिक ६०० भन्दाबढी नेपालीको शव नेपाल आउने अवस्थाको अन्त्य गर्न स्वदेशमा नै रोजगारी सिजना गर्नु आवश्यक छ ।”

रत्ननगर नगरपालिकाका प्रमुख नारायण वन, एनआरएनका संस्थापक अध्यक्ष डा उपेन्द्र महत्व र क्षेत्रीय होटल सङ्घ चितवनका अध्यक्ष दीपक भट्टराईले बोल्नुभएको थियो । हस्पिटालिटीका प्रमुख रामेश्वर शाहले रु २५ करोडको लगानीमा सौराहामा बुटिक रिसोर्ट निर्माण गर्न शुरु गरिएको जानकारी दिनुभयो । उहाँ गैरआवासीय नेपाली महासङ्घका प्रतिनिधि हुनुहुन्छ । चौँतिस कोठामा ६५ बेडको सो रिसोर्ट सन् २०२२ बाट सञ्चालनमा आउनेछ । १२ कट्ठा १० धुर क्षेत्रफलमा रिसोर्ट निर्माण गर्न लागिएको हो ।