नेपालमा नेगेटिभ आएको रिपोर्ट विदेशमा पोजेटिभ ! नेपालकाे प्रयोगशालाको विश्‍वसनीयतामा प्रश्‍न

काठमाडौं : नेपाल वायुसेवा निगमले नेपालका प्रयोगशालामा गरिएको कोरोना परीक्षणको रिपोर्ट नेगेटिभ आउने तर विदेशमा पुनः परीक्षण गर्दा पोजेटिभ आएकोप्रति ध्यानाकर्षण गराएको छ ।

निगमले उडान गर्ने गन्तव्यहरुमा यात्रा गर्न स्वास्थ्य तथा जनसंख्या मन्त्रालयबाट मान्यता प्राप्त प्रयोगशालाबाट आरटी पीसीआर परीक्षण गरी ७२ घण्टाभित्रको रिपोर्टलाई मान्यता दिए पनि विगत केही दिनदेखि हङकङ, दुबई, नारिताजस्ता गन्तव्यहरुमा ७२ घण्टाको पीसीआर रिपोर्टका बाबजुद पनि त्यहाँ परीक्षण गर्दा कोभिड-१९ पोजेटिभ देखिएको जनाएको छ ।

जसले गर्दा सम्बन्धित देशका निकायहरुले निगमलाई सचेत गराउनुका साथै कतिपय उडानमा रोकसमेत लगाएकाले निगमलाई आर्थिक तथा प्रतिष्ठाको दृष्टिले ठूलो नोक्सानी पर्न गएको भन्दै ध्यानाकर्षण गराएको हो ।

विज्ञप्ति जारी गर्दै यी घटनाहरुले निगमको मात्र नभई समग्र देशकै प्रतिष्ठामा नकारात्मक असर परेको जनाएको छ । “साथै नेपालका स्वास्थ्य प्रयोगशालाहरुको विश्‍वसनीयतामै प्रश्‍न खडा गरेको छ,” निगमकी प्रवक्ता करिश्मा श्रेष्ठद्वारा जारी विज्ञप्तिमा भनिएको छ, “तसर्थ निगम नेपाल सरकारबाट मान्यता प्राप्त स्वास्थ्य प्रयोगशालाहरुलाई सजगता अपनाउन अनुरोध गर्दछ ।”

निगमले यात्रुको सुरक्षा तथा सरोकारवाला नियकाहरुको मापदण्डका सन्दर्भमा सजग र सचेत रहेको भन्दै निगमले विश्‍वव्यापी कोरोना महामारीका कारण उड्‍डयन क्षेत्रमा परेको समस्या तथा स्वास्थ्य सुरक्षाका अतिरिक्त मापदण्डहरु लागु गर्ने गराउने कुरामा कुनै सम्झौता नगरिएको जनाएको छ ।

निगमले यात्रुलाई पनि आरटी पीसीआरको नमुना दिएपछि पनि विशेष सावधानी अपनाई पूर्ण रुपमा सजग रहन अनुरोध गरेको छ । रिपोर्ट नेगेटिभ देखाएर उडान गर्ने यात्रुको सम्बन्धित देशहरुमा पुनः परीक्षण गर्दा पोजेटिभ देखिए त्यसको सम्पूर्ण जिम्मेवारी यात्रु स्वयंले लिनुपर्ने समेत निगमले जनाएको छ ।

निगमले ७२ घण्टाभित्रको कोरोना परीक्षण गर्दाको रिपोर्टका आधारमा यात्रुलाई उडाउँदै आएको छ । तर, नेपालमा नेगेटिभ देखिएका यात्रुमध्ये गन्तव्य मुलुकमा पुगेपछि सम्बन्धित देशले पुनः परीक्षण गर्दा केही यात्रुमा पोजेटिभ देखिएपछि निगम कारबाहीमा पर्दै आएको छ । निगमलाई हङकङले दुईपटक उडानमै प्रतिबन्ध लगाएको थियो । दुबईले पनि उडान रोक्ने चेतावनी दिइसकेको छ ।

निगमका सह-प्रवक्ता शुलेख मिश्रले जापानले निगमलाई इमेलमार्फत नेपालबाट गएका २ देखि १० जनासम्म यात्रुमा कोरोना पोजेटिभ देखिएकाले सचेत बन्‍न आग्रह गरेको बताए । यस्तै यूएईले पनि पत्र नै लेखेर निगमको ध्यानाकर्षण गराइसकेको छ । सोही आधारमा निगम सचेत र संवेदशील रहेको उनले बताए ।

जापान, हङकङ, यूएईले गराएको ध्यानाकर्षणबारे तालुक मन्त्रालय संस्कृति, पर्यटन तथा नागरिक उड्‍डयन मन्त्रालयलाई जानकारी गराएको र निरन्तर सम्पर्कमा रहेको प्रवक्ता श्रेष्ठले बताइन् ।