केही स्थानमा हावाहुरीसहित भारी वर्षाको सम्भावना

काठमाडौं : काठमाडौं उपत्यकासहित देशका केही स्थानमा सोमबार दिउँसो वर्षा भएको छ ।

प्रदेश नम्बर-१, प्रदेश नम्बर-२ तथा वाग्मती प्रदेशमा सामान्यदेखि पूर्ण बदली रही केही स्थानहरुमा मेघगर्जन र चट्याङसहित हल्कादेखि मध्यम वर्षा भएको हो ।

योक्रम अबको चार-पाँच दिन रहने जल तथा मौसम विज्ञान विभाग, मौसम पूर्वानुमान महाशाखाले जनाएको छ ।

यो अवधिमा देशका केही स्थानमा मेघगर्जन र चट्याङसहितको भारी वर्षा हुनेछ । तराई क्षेत्रमा हावाहुरीकोसमेत सम्भावना रहेको छ ।

हाल उत्तरपूर्व बंगालको खाडीमा रहेको न्यूनचापीय क्षेत्र उत्तर-पश्चिमतर्फ सर्नेक्रममा मनसुन सक्रिय भएको हो । सो प्रणाली नेपालनजिकै भएर सर्ने हुँदा वर्षाको सम्भावना अधिक देखिएको महाशाखाले जनाएको छ ।

यो अवधिमा काठमाडौं उपत्यकामा भने भारी वर्षाको सम्भावना देखिँदैन ।

‘पहाडी र तराईका केही स्थानमा भारी वर्षाको सम्भावना देखिन्छ’-महाशाखाका मौसमविद् राजु प्रधानाङ्गले इमेजखबरसित भन्नुभयो-‘काठमाडौं उपत्यकामा हल्कादेखि मध्यम वर्षाको सम्भावना छ ।’

उहाँकाअनुसार मनसुनी प्रणालीको प्रभावले मेघगर्जन र चट्याङसहितको वर्षा तथा हावाहुरीको सम्भावना रहेको हो ।

बढी वर्षा

नेपालमा सामान्यतया मनसुन १० जुनमा प्रवेश गर्ने गर्दछ भने २३ सेप्टेम्बरमा बाहिरिन्छ । जुनदेखि सेप्टेम्बरसम्म चार महिनाको अवधिलाई दक्षिण एसियाली मनसुनको अवधि भनिन्छ ।

यो वर्ष दुई दिन ढिलागरी मनसुन नेपाल भित्रिएको थियो । अझै करिब एक साता देशमा मनसुनको प्रभाव रहने मौसमविद् प्रधानाङ्गले बताउनुभयो ।

विगतका वर्षको तुलनामा यो वर्षको मनसुनमा बढी वर्षा भइसकेको उहाँले जानकारी दिनुभयो ।

मनुसन अवधिमा नेपालमा वार्षिक वर्षाको करिब ८० प्रतिशत वर्षा हुने गर्दछ ।

सतर्कता अपनाउन अनुरोध

मौसम पूर्वानुमान महाशाखाले आउँदो २४ घन्टाका लागि प्रदेश-१, प्रदेश- २, वाग्मती प्रदेशका एक/दुई स्थानमा भारी वर्षाको सम्भावना रहेकोले सतर्कता अपनाउनसमेत अनुरोध गरेको छ ।

यस्तै, बाढी पूर्वानुमान महाशाखाले असोज ६ गते रातिबाट देशका सबै नदीमा बहाव बढ्ने जनाएको छ ।

महाशाखाले असोज ७, ८, ९ र १० गते देशैभरका नदीमा बहाव उच्च हुने पूर्वानुमान रहेको भन्दै असोज ७ देखि ११ गतेसम्म नदीतटीय क्षेत्रमा उच्च सतर्कता अपनाउन अनुरोध गरेको छ ।

मौसम पूर्वानुमान महाशाखाले सोमबार बिहान जारी गरेको मौसम पूर्वानुमान बुलेटिन तल पढ्नोस् ।

आगामी तीन दिनको मौसम पूर्वानुमान

असोज ५ गते (सोमबार)

दिउँसो : देशभर सामान्यतया बदली रही देशका केही स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ साथै प्रदेश नं १, प्रदेश नं २ का केहि स्थानहरुमा हावाहुरिको सम्भावना रहेको छ । ।

राती : देशभर सामान्यतया बदली रही केही स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । साथै प्रदेश नं १, प्रदेश नं २ र बाग्मती प्रदेशका एक-दुई स्थानमा भारी वर्षाको सम्भावना रहेको छ साथै प्रदेश नं १, प्रदेश नं २, बाग्मती प्रदेश, गण्डकी प्रदेश र प्रदेश ५ का केहि स्थानहरुमा हावाहुरिको सम्भावना रहेको छ ।

असोज ६ गते (मंगलबार)

दिउँसो : देशभर सामान्यतया बदली रही देशका केही स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । प्रदेश नं १, प्रदेश २, बागमती प्रदेश, गण्डकी प्रदेशका थोरै स्थानमा भारी वर्षाको सम्भावना रहेको छ साथै प्रदेश नं १, प्रदेश नं २, बाग्मती प्रदेश, गण्डकी प्रदेश र प्रदेश ५ का केहि स्थानहरुमा हावाहुरिको सम्भावना रहेको छ ।

राती : देशभर सामान्यतया बदली रही केही स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । प्रदेश नं १, प्रदेश २, बागमती प्रदेश, गण्डकी प्रदेशका केहि स्थानमा भारी वर्षा र प्रदेश नं १ का १/२ स्थानहरुमा धेरै भारी वर्षाको सम्भावना रहेको छ साथै प्रदेश नं १, प्रदेश नं २, बाग्मती प्रदेश, गण्डकी प्रदेश र प्रदेश ५ का केहि स्थानहरुमा हावाहुरिको सम्भावना रहेको छ ।

असोज ७ गते (बुधबार)

दिउँसो : देशभर सामान्यतया बदली रही देशका केही स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । प्रदेश नं १, प्रदेश २, बागमती प्रदेश, गण्डकी प्रदेशका थोरै स्थानमा भारी वर्षाको सम्भावना रहेको छ साथै प्रदेश नं १, प्रदेश नं २, बाग्मती प्रदेश, गण्डकी प्रदेश र प्रदेश ५ का केहि स्थानहरुमा हावाहुरिको सम्भावना रहेको छ ।

राती : देशभर सामान्यतया बदली रही धेरै स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना र केहि स्थानहरुमा भारी वर्षाको सम्भावना रहेको छ । गण्डकी प्रदेश, कर्णालि प्रदेश र सुदुर पश्चिम प्रदेशका १/२ स्थानहरुमा धेरै भारी वर्षाको सम्भावना रहेको छ साथै प्रदेश नं १, प्रदेश नं २, बाग्मती प्रदेश, गण्डकी प्रदेश र प्रदेश ५, कर्णालि प्रदेश र सुदुर पश्चिम प्रदेशका केहि स्थानहरुमा हावाहुरिको सम्भावना रहेको छ ।

आगामी २४ घण्टाका लागि चेतावनी तथा परामर्श (Warning/Advisory for next 24 hours):

प्रदेश १, प्रदेश २, बागमती प्रदेशका एक-दुई स्थानमा भारी वर्षाको सम्भावना रहेकोले ती स्थानहरुका नदीमा पानीको बहाव बढ्ने, पहाडी क्षेत्रमा पहिरो जाने, सडक तथा हवाई यातायात प्रभावित हुन सक्ने भएकोले आवश्यक सतर्कता अपनाउन हुन अनुरोध छ।