डा. गोविन्द केसीले थाले जुम्लामा १९ औं सत्याग्रह (माग सहित )

काठमाडौं : चिकित्सा शिक्षा सुधारका अभियन्ता वरिष्ठ चिकित्सक डा. गोविन्द केसीले जुम्लामा सत्याग्रह अनशन शुरु गर्नुभएको छ ।

आफूसँग सरकारले यसअघि गरेका सम्झौता पूरा गर्नेलगायतका ६ बुँदे माग डा. केसीले सोमबार दिउँसो २ बजेदेखि १९ औं अनशन थाल्नु भएको हो ।

जुम्ला बजारनजिकै सिंहचौरस्थित बाबिरा मस्ठो मन्दिरमा सत्याग्रह थाल्नु भएका डा. केसीले आफूलाई हिंडडुल गर्नदेखि उपचार गर्न जान समेत रोकेकाले बिना जानकारी सत्याग्रह थालेको प्रतिक्रिया दिनुभएको छ ।

कर्णाली स्वास्थ्य विज्ञान प्रतिष्ठानमा एमबीबीएस कार्यक्रम थाल्न, मास्कको प्रयोग र सामाजिक दूरी अनिवार्य गरी पिसीआर परीक्षण व्यापक बनाउन, निषेधाज्ञा र लकडाउन अन्त्य गर्न उहाँको माग छ ।

यसैगरी उहाँले भ्रष्टाचार प्रकरणहरुको विषय पनि उठाउनुभएको छ । राज्यलक्ष्मी गोल्छा घुसकाण्ड, आयल निगम जग्गा खरिदकाण्ड, वाइड बडी काण्ड, सेक्युरिटी प्रेस खरिद काण्ड, दरबारमार्गको जग्गा काण्ड, ओम्नी समूहको औषधि खरिद काण्ड जस्ता ठूला भ्रष्टाचार काण्ड र बालुवाटार जग्गा काण्डका दोषीलाई कानुन बमोजिम छानविन र कारवाही गर्न माग गर्नुभएको छ ।

ठूला भ्रष्टाचार प्रकरणमा उन्मुक्ति दिएको भन्दै डा. केसीले अख्तियारका बहालवाला तथा सेवा निवृत्त आयुक्तहरुमाथि पनि छानविन र महाभियोगलगायतका कारवाही गर्न माग गर्नुभएको छ ।

अख्तियारका आयुक्तदेखि भ्रष्टाचार काण्डमा मुछिएकाहरुको सम्पत्ति शुद्धीकरणसम्बन्धमा छानबिन गर्नुपर्ने उहाँको माग छ । महामारीको समयमा नागरिक भोकै हुँदा राज्य सञ्चालक र तिनकानिकटका व्यक्तिहरु भ्रष्टाचारमा लिप्त रहेको आरोप केसीले लगाउनुभएको छ ।

लकडाउन अघिदेखि नै जुम्लामा रहनु भएका केसीले ससुदूरपश्चिमका दुर्गम जिल्लादेखि कर्णालीका विकट जिल्लामा उपचारविहीन नागरिकलाई स्वास्थ्य सेवा उपलब्ध गराउँदै आउनु भएको थियो ।

यस्ता छन्, डा. केसीका मागः

१. कर्णाली स्वास्थ्य विज्ञान प्रतिष्ठानमा तत्काल पूर्वाधार र जनशक्ति प र्याएर एमबीबीएस लगायतका कार्यक्रमहरु संचालन गरियोस् । गेटा मेडिकल कलेज र राप्ति स्वास्थ्य विज्ञान प्रतिष्ठानमा शीघ्र पूर्वाधार र जनशक्ति पुर्याएर पठनपाठन शुरू गरियोस् । प्रदेश नं दुई र गण्डकी प्रदेश तथा डोटी वा डडेल्धुरा, उदयपुर र इलाम वा पाँचथरमा सरकारी मेडिकल कलेज खोल्ने प्रक्रिया अघि बढाइयोस् ।

२. मास्कको प्रयोग र सामाजिक दुरीलाई अनिवार्य गर्दै पीसीआर परीक्षण व्यापक बनाएर लकडाउन र निषेधाज्ञा अन्त गरियोस् । कोभिड तथा अन्य रोगका सबै बिरामीहरुका लागि समेत उचित उपचारको व्यवस्था गरियोस् ।

३. हामीसँग २०७५ साउन १० गते भएको सम्झौताअनुसार चिकित्सा शिक्षा ऐनमा संशोधन गरियोस् ।

४. त्रिवि चिकित्साशास्त्र अध्ययन संस्थानमा वरिष्ठता मिचेर भएका नियुक्तिहरु सच्याउँदै सबै पदमा वरिष्ठताका आधारमा नियुक्ति गरियोस् । विश्वबिद्यालय, काउंसिल र प्रतिस्ठानहरुमा पदाधिकारी नियुक्तिका लागि पदाधिकारी मापदण्ड निर्धारण समितिले दिएको सुझाब अनुरूप निष्पक्ष र पारदर्शि ढङ्गले पदाधिकारी नियुक्त गर्ने कानूनी व्यवस्था गरियोस् ।

५. बयलपाटा अस्पताललाई नियमित आवश्यक बजेटको व्यवस्था गरी दिगो निशुल्क सेवा सुनिस्चित गरियोस् ।

६. राज्य लक्ष्मी गोल्छा घुस काण्ड, आयल निगम जग्गा खरिद काण्ड, वाइड बडी काण्ड, सेक्युरिटी प्रेस खरिद काण्ड, दरबारमार्गको जग्गा काण्ड, ओम्नी समुहको औषधि खरिद काण्ड लगायत सबै ठूला भ्रष्टाचार काण्डका दोषीहरुलाई कानुन बमोजिम छानविन र कारवाही गरियोस् । बालुवाटार जग्गा काण्डमा आपराधिक लाभ लिने सत्तारुढ दलका नेतामाथि छानविन र कारवाही चलाइयोस् । यी सबै प्रकरणका दोषीहरुलाई कारवाही नगरेर सत्ताको इशारामा उन्मुक्ति दिएमा अख्तियारका बहालवाला तथा सेवा निवृत्त आयुक्तहरुमाथि पनि कानुन बमोजिम छानविन र महाभियोगलगायतका कारवाही गरियोस् । अख्तियारका आयुक्त लगायत सबै दोषी व्यक्तिहरुमाथि सम्पत्ति शुद्धीकरणको मुद्दा चलाइयोस् ।