नेपालमा १५,०१६ जनाले कोरोना जिते, ५,९२५ अझै लड्दैछन्

काठमाडौं । कोरोना भाइरस संक्रमण नेपालमा पछिल्लोसमय फेरि बढ्न थालेको छ । यद्यपि संक्रमित थपिए पनि कोरोनालाई जितेर अस्पतालबाट घर फर्किनेहरु पनि उत्तिकै छन् ।

मंगलबार मात्र ६५ जना संक्रमित कोरोनालाई जितेर घर फर्किएको स्वास्थ्य तथा जनसंख्या मन्त्रालयले जनाएको छ । अहिलेसम्म डिस्चार्ज हुनेको संख्या १५ हजार २६ पुगेको छ । मन्त्रालयका प्रवक्ता डा. जागेश्वर गौतमका अनुसार अहिले देशभर ५ हजार ९ सय २५ संक्रमित उपचाररत रहेका छन ।

प्रदेश नम्बर १ मा ३ सय ३४, प्रदेश नम्बर २ मा २ हजार ४ सय २७, बागमती प्रदेशमा ७ सय १६ र गण्डकी प्रदेशमा २ सय ६३ जना संक्रमित उपचाररत रहेका छन । प्रदेश नम्बर ५ मा ३ सय ३५ जनाको उपचार भइरहेको छ ।

कर्णाली प्रदेशमा २ सय ९५ र सुदूरपश्चिम प्रदेशमा १ हजार ५ सय ५५ जना उपचाररत रहेको प्रवक्ता डा. गौतमले जानकारी दिनुभयो ।