हास्य-व्यङ्ग्य गजल : इँजार हुन पाइयोस्

 इँजार हुन पाइयोस्

~एकु घिमिरे~

नेताज्यूको सुरुवालको इँजार हुन पाइयोस्
मन्त्रीज्यूको भेडा हेर्न, गाई दुहुन पाइयोस् ।

जता शक्ति, उतै भक्ति, के लाज –सरम ?
अपच भई कट्टु छेर्दा गोप्य धुन पाइयोस् ।

केही गरी सत्ताबाट भए पत्तासाफ
गोही आँशु झारी–झारी सँगै रुन पाइयोस् ।

उसको पालो सकिएछि’ हजुरकै हो पालो
चम्चेबाट बढुवा भई पुन्यु छुन पाइयोस् ।

जनता हैन प्रजालाई पित्तल बाँड्नुपर्छ
हजुर लग्नु हीरा–मोती, आफू सुन पाइयोस् ।

एकु घिमिरे
चैनपुर , सङ्खुवासभा