कोरोनाका कारण थप २ को मृत्यु, मृतकको संख्या ५४ पुग्यो

काठमाडौं । नेपालमा कोरोना संक्रमणबाट मृत्यु हुनेको संख्या ५४ पुगेको छ । वीरगञ्जमा विहिवार थप २ जना मृतकमा संक्रमण पुष्टि भएसँगै मृतकको संख्या ५४ पुगेको हो ।

विहिवार वीरगञ्ज–१६ नगवाका ३५ बर्षीय पुरुषको गण्डक कोरोना अस्पतालमा उपचारका क्रममा निधन भएको हो ।

मंगलबार अस्पताल आइपुगेका उनको स्वाबको नमुना लिएर परिक्षण गर्दा कोरोना संक्रमण पुष्टि भएको बताईएको छ ।

यसैगरी वीरगञ्जमै हिजो बिहान घरमै मृत्यु भएका थप एक जनामा पनि कोरोना संक्रमण पुष्टि भएको छ ।

वीरगञ्ज–२ छपकैयाका ६५ बर्षिय पुरुषमा कोरोना संक्रमण पुष्टि भएको हो । यसैबिच, देशभर कोरोना संक्रमितको संख्या १९ हजार ५ सय ४७ पुगेको छ ।

पछिल्लो २४ घण्टामा २ सय ७४ जनामा संक्रमण पुष्टि भएसंगै जम्मा संक्रमितको संख्या १९ हजार ५ सय ४७ पुगेको हो ।

थपिनेमा काठमाडौं उपत्यकाका ४५ जना रहेका छन् । हाल ५ हजार २ सय २७ जना सक्रिय संक्रमित रहेका छन् ।

हिजै २ सय २७ जना संक्रमित निको भएर घर फर्केका छन् । अहिलेसम्म जम्मा १४ हजार २ सय ४८ जना डिस्चार्ज भएर घर फर्केको मन्त्रालयले जनाएको छ ।

पछिल्लो २४ घण्टामा ६ हजार ३ सय ४ जनाको पीसीआर परीक्षण भएको छ । देशभर हाल १३ हजार २ सय १ जना क्वारेन्टिनमा रहेका छन् ।

हाल ५ हजार २ सय २७ जना आइसोलेसनमा रहेका छन् । भोजपुर, संखुवासभा, रसुवा, मनाङ्ग र मुस्ताङ्ग गरी पाँच जिल्ला संक्रमणमुक्त हुन सफल भएका छन् ।