१२० दिनपछि आजबाट हट्यो लकडाउन

चितवनः विगत १२० दिनदेखि जारी लकडाउन मङ्गलबार मध्यरातबाट अन्त्य भएकाे छ । गत चैत ११ गतेबाट जारी भएको लकडाउन सरकारले मङ्गलबार मध्यरातबाट हटाएकाे हाे ।
सरकारका प्रवक्ता डा. युवराज खतिवडाका अनुसार आम नागरिकमा परेको मनोवैज्ञानिक त्रास कम गर्न लकडाउन अन्त्य गर्ने निर्णय गरिएको हो । लकडाउन खुलेपनि अवस्था हेरेर निषेधित क्षेत्र घोषणा गर्न सकिने उनले बताए । सरकारले मङ्गलबार रातिदेखि लकडाउन अन्त्य गरेपनि शैक्षिक संस्था, धार्मिक तथा सामाजिक स्थलहरु, ट्यूसन सेन्टर, सिनेमा घर, डान्सबार, सैलुन व्युटि पार्लर स्वीमिङ पुल लगायतका क्षेत्र अर्को निर्णय नभएसम्मका लागि बन्द नै रहने उनले बताए ।
यद्यपी विद्यार्थी भर्ना परीक्षाफल प्रकाशनका काम भदौ १ गतेबाट गर्न सकिने निर्णय भएको उनले बताए । सरकारले साउन १५ गतेबाट होटल, रेष्टुरेण्ट, ट्राभल र टेकिङ एजेन्सी र पर्वतारोहण सम्बन्धि कार्यालयहरु खुला गर्ने निर्णय गरेको छ । सेमिनार र भेला भने गर्न नपाइने उनले बताए । भदौ १ गतेबाट लामो दुरीका सवारी साधन तथा राष्ट्रिय र अन्तर्राष्ट्रिय हवाई उडान पनि सञ्चालन गर्ने निर्णय गरेको छ । त्यसका लागि स्वास्थ्य मन्त्रालयले तोकेका आवश्यक सुरक्षाका उपायहरु अपनाउन सरकारले सबैमा आग्रह गरेको छ ।

अन्तर्राष्ट्रिय सीमा नाकाको हकमा साउन ३२ गतेसम्म आवतजावत बन्द गरिएको उनले बताए । स्वदेश आउनै पर्ने नागरिकहरुको हकमा तोकिएका सीमा विन्दुबाट आउन पाइने तर लुकिछिपि आएको खण्डमा कानून अनुसार कारवाही हुने उनले बताए ।