नेपालका दावाले पनि जिते भर्चुअल विश्व पुम्सेमा स्वर्ण पदक, सस्मिता र अर्जुन रजतमै समेटिए

पोखरा : अमेरिकामा संचालित भर्चुअल अन्तर्राष्ट्रिय पुम्से च्याम्पियनसीपमा नेपालले अर्को स्वर्ण पदक पनि हात पारेको छ ।

युएस वेस्ट कोस्ट तेक्वान्दो संघ, पोर्टल्यान्ड, अमेरिकाको तत्वाधान तथा पान अमेरिकन तेक्वान्दो युनियन, पोर्टल्यान्डको आयोजना भएको च्याम्पियनसीपमा नेपालका दावा शेर्पाले स्वर्ण जितेका हुन् ।

यसअघि ५० केजीमुनि नेपालका लक्ष्मण ऐर क्षेत्रीले स्वर्ण जितेका थिए । त्यस्तै, ४० वर्ष मूनीमा रेशमाया गुरुङले कास्य पदक जितेकी थिइन् ।

शनिबार राति भएको कलर बेल्ट अन्तर्गत जुनियर इभेन्टमा मुस्कान सेवाका दावा शेर्पाले पहिलो हुँदै स्वर्ण पदक जितेका हुन् ।

यस्तै, कलर बेल्टमा नेपालकै माइती नेपालकी सस्मिता केसीले रजत जितेकी छिन् । यसैगरी, नेपालकै अर्जुन तामाङले पनि कलर बेल्टमै जुनियरतर्फ रजत पदक जितेका छन् ।

च्याम्पियनसीपमा विश्वका २० भन्दा बढी देशका खेलाडीले जुममार्फत अनलाइन प्रस्तुति दिएर प्रतिस्पर्धा गरेका थिए । यो च्याम्पियनसिपमा जुममार्फत प्रत्यक्ष पुम्से प्रदर्शन गर्नुपर्ने थियो ।

अघिल्लो महिना भएको अनलाईन पुम्से युरोपियन च्याम्पियनसीप र विश्व च्याम्पियनसीप पुम्सेको भिडियो खिचेर यूट्युब लिंक पठाएर सहभागि हुनपर्ने थियो ।
नेपालबाट कुल ७ खेलाडीले प्रतिस्पर्धा गर्दा २ स्वर्ण २ रजत र १ कांस्य जित्न सफल भएको हो ।

च्याम्पियनसीपमा २ खेलाडी भने पदकविहीन बने ।
सो च्याम्पियनसीपमा नेपालका अशोक खड्काले निर्णायकको भूमिका निर्वाह गरिरहेका छन् । कोरोना भाइरस कोभिड १९ का कारण पछिल्लो समय अनलाइन पुम्से प्रतियोगिता हुँदै आइरहेका छन् ।