चीनबाट ल्याइएका कसैलाई कोरोना भाइरस संक्रमणको लक्षण देखिएन

 

काठमाडौं : कोरोना भाइरसको उद्गमस्थल चीनको वुहानबाट उद्दार गरेर ल्याइएका १७५ जना नेपाली कसैमा कोरोना भाइरस संक्रमणको लक्षण नदेखिएको स्वास्थ्य मन्त्रालयले जनाएको छ।

नेपाल वायुसेवा निगमको चार्टर्ड जहाजबाट ४ फागुन बिहान त्रिभुवन अन्तर्राष्‍ट्रिय विमानस्थल अवतरण गरेका उनीहरूलाई भक्तपुरस्थित खरिपाटी क्वारेन्टाइनमा राखिएको छ।

उद्दार गरिएकामा १३४ जना पुरूष र ४१ जना महिला छन्।

पहिलो दिन ४ फागुनमा क्वारेन्टाइनमा रहेका १७५ जनाकै घाँटीको स्वाव नमूना संकलन गरिएको थियो।

स्वास्थ्य तथा जनसंख्या मन्त्रालयका सहायक प्रवक्ता सागर दाहालका अनुसार स्वास्थ्य अवस्थाको पछिल्लो जानकारीका लागि घाँटीको र्‍र्‍याल (थ्रोट स्वाव) नमुना संकलन गरिएको हो।

संकलित थ्रोट स्वाव परीक्षणका लागि टेकुस्थित राष्ट्रिय प्रयोगशालामा पठाइएको छ।

दाहालले भने, “सबैजना सकुशल हुनुहुन्छ। अहिलेसम्म कोभिड-१९ भाइरस संक्रमणको कुनै लक्षण देखिएको छैन।”

क्वारेन्टाइन अवधिभर नियमित स्वास्थ्य जाँच र शंकास्पद लक्षण देखिएमा प्रयोगशाला परीक्षण र उपचारको लागि अस्पतालमा व्यवस्था मिलाइएको आजको अन्‍नपूर्ण पोष्टमा समाचार छ।