अबिरमाला लगाएर बिजय जुलुसमा निस्केका कांग्रेस उम्मेद्बार एक मतले हारेपछि ..

धरान :  चुनाव जितेर अबिर माला समेत लगाइसकेका उम्मेदवारले माला फुकालेर अर्कोलाई बधाई दिनुपर्‍यो भने कस्तो होला ? धरान उपहानगरपालिका वडा नम्बर ७ को उपचुनावमा यस्तै भएको छ ।

धरान उपहानगरपालिको मेयर र वडाध्यक्ष दुवैमा नेपाली कांग्रेसले जितेको भनेर बिजय जुलुस पनि हुँदै थियो । तर एकाएक वडा नम्बर ७ को वडाध्यक्षमा नेकपाका जीवन सुवेदीले १ मतले जितेको आधिकारिक घोषणापछि अबिर माला लगाएर विजयोत्सवमा रहेका कांग्रेसका सुवर्ण पालिखेले माला फुकाल्नुपर्‍यो ।

विजय उत्सव मनाइसकेपछि उनी एक मतले हारेको जानकारी निर्वाचन आयोगले गराएपछि उनले अबिर पुछेर माला फुकाले । यसअघि बदर भनिएको मत पुनः जाँच गर्दा सदर भएपछि नेकपाका जीवन सुवेदी ६२२ मतले बिजयी भए । पालिखे ६२१ मतमा रोकिए ।

लगाइसकेको माला फुकाल्दा उनी हतप्रभ देखिन्थे । कांग्रेसले परिणाम अस्वीकार गर्दै पुनः मतगणनाको माग गरेको छ ।

वडाध्यक्षमा निर्वाचित सुवेदी २०७४ को चुनावमा वडा सदस्य निर्वाचित भएका थिए । उनी २०५४ मै वडाध्यक्ष भइसकेको तत्कालीन एमालेका पुराना नेता हुन् ।

धरान ७ का वडाध्यक्ष भुवन मोक्तानको निधनपछि उपचुनाव भएको हो । मोक्तान एमालेबाट निर्वाचित भएका थिए ।