चितवनमा चित्तल मारेको आरोपमा एक जना पक्राउ

चितवन । चितवन राष्ट्रिय निकुञ्जको सुरक्षार्थरुपमा खटिएको बटुकदल गणले खैरहनी नगरपालिका वडा नं १३ बाट चित्तल काटेर लुकाएको आरोपमा एक जनालाई पक्राउ गरेको छ ।

खैरहनी १३ बस्ने ४२ वर्षका हेमबहादुर ढुंगानाको घरनजिकै टौवामा परालले छोपी आठ वर्षको भाले चित्तल मारेर लुकाइ राखेको अवस्थामा फेला पारिएको बटुकदल गणले जनाएको छ ।

ढुंगानालाई पक्राउ गरी थप अनुसन्धानको लागि चितवन राष्ट्रिय निकञ्ज कार्यालयमा बुझाइएको बटुक दल गणले जनाएको छ । गणले घटनास्थलबाट मृत चित्तलसहित एक थान खुकुरी, एक थान चक्कु र एक थान दाउसमेत बरामद गरेको छ ।

चितवन राष्ट्रिय निकुञ्जका सूचना अधिकारी गोपाल घिमिरेले पक्राउ परेकालाई थप अनुसन्धान भइरहेको जानकारी दिए ।
चितवन राष्ट्रिय निकुञ्ज सुरक्षार्थ तैनाथ श्री बटुकदल गणले दैनिक रुपमा प्रकृति संरक्षण तथा वन्यजन्तुहरुको चोरी शिकारी नियन्त्रणको लागि विभिन्न अपरेशन गतिविधिहरु संचालन गर्दै आइरहेको जनाएको छ ।