गणतन्त्र र संघीयताका धरापमा पारेको छ : कांग्रेस नेता कोइराला

चितवन ,चैत ९ । नेपाली कांग्रेसका नेता डा. शेखर कोइरालाले गणतन्त्र र संघीयता धरापमा पारिएको बताएका छन्। शनिबार चितवनको रत्ननगरमा गरिएको अगुवा कार्याकर्ता प्रशिक्षण कार्यक्रममा उनले लामो सङ्घर्षपछि प्राप्त संघीयतालाई सफल बनाउन आफ्नो पार्टी सजग हुनुपर्ने बेला आएको बताए।

“गणतन्त्र र सङ्घीयता धरापमा परेको छ, त्यसको संरक्षणका लागि कांग्रेस लड्नुपर्छ” कोइरालाले भने। मुलुकमा दण्डहिनता बढ्दै गएको बताउँदै उनले अहिलेको समयमा लगानीको वातावरण बन्न नसकेको आरोप लगाए। राजनीतिक स्थिरता भए पनि वित्तीय संस्था धराशाही बन्दै जानु, व्यापार घाटा बढ्दै जानु दुःखद् रहेको उनको भनाइ छ।

फरक प्रसंगमा नेता कोइरालाले पार्टीलाई गिरोहले सञ्चालन गरेको बताए। उनले भने, “राजनीतिक संस्कारसँगै नैतिकता सिकाउँदै पार्टीलाई बलियो बनाउनु आवश्यक छ।” कांग्रेसलाई बलियो बनाउन महासमिति बैठकको निर्णय कार्यान्वयन गर्दै समयमा महाधिवेशन गर्नु आवश्यक रहेको उनको भनाइ थियो।