निर्मला हत्या प्रकरण : हत्यारा पत्ता नलागेपछि धर्नामा बस्दै बाबु

काठमाडौँ, २५ कात्तिक । बलात्कारपछि हत्या गरिएकी कञ्चनपुरकी निर्मला पन्तको हत्या प्रकरण १०६ दिन पुगि सक्दा पनि अझै अपराधी पत्ता नलागेपछि पीडित परिवार आजदेखि धर्नामा बस्ने भएका छन्। हत्या भएको तीन महिना बितिसक्दा पनि हत्यारा पत्ता नलागेको भन्दै परिवार धर्नामा बस्न लागेको निर्मलाकी आमा दुर्गादेवी पन्तले बताइन्।

पहिलोपोस्टसँगको कुराकानीमा आमा दुर्गाले भनिन् यत्तिका समय भइसक्यो हत्यारा पत्ता लागेको छैन। सरकारले पनि लाग्छ-लाग्छ भनेर आश्वासनमात्र दिइरहेको छ। दबाब होला कि भनेर धर्ना बस्न लागिएको हो।

जिल्ला प्रशासन कार्यालय अगाडि धर्नाका लागि सबै तयारी पूरा भइसकेको आमा दुर्गाले बताइन्।

अहिले घरमा केटाकेटीको रेखदेख गर्नु परेकाले म चाहिँ केही दिन धर्नामा बस्दिनँ। श्रीमान आजैदेखि धर्नामा बस्नुहुन्छु उनले भनिन्।

निर्मलाको साउन ११ गते बलात्कारपछि हत्या भएको थियो। शव परीक्षण प्रतिवेदनले निर्मलाको बलात्कारपछि हत्या भएको रहस्य खुलेको थियो। यसबीचमा प्रहरीले ४ जनाको डिएनए परीक्षण समेत गरे पनि हत्यारा पत्ता लाग्न सकेको छैन। अन्य शंकास्पद चारको नमुना संकलन गरे पनि प्रतिवेदन आएको छैन।

प्रहरीले प्रारम्भिक अनुसन्धानमा लापरबाही भएको भन्दै कञ्चनपुरका तत्कालीन एसपी दिल्लीराज विष्ट र इन्सपेक्टर जगदिश भट्टलाई सेवा बर्खास्त गरिएको छ। अन्य ६ जना प्रहरी निलम्बनमा छन्।

प्रहरीले सुरुमा स्थानीय दिलीपसिंह विष्टलाई हत्या अभियोगमा सार्वजनिक गरे पनि उनी अदालतको साधरण तारेखमा छुटेका छन्। नक्कली अभियुक्त खडा गरिएको भन्दै स्थानीयले विष्ट प्रक्राउपछि निरन्तर प्रदर्शन गरेका थिए।

घटना छानबिन तथा अनुसन्धानका लागि गृह मन्त्रालय र नेपाल प्रहरीले छुट्टाछुट्टै दुई टोली गठन गरेको थियो। दुबै टोलीले अनुसन्धानमा प्रहरीले लापरबाही गरेको र प्रमाण नष्ट पारिएको प्रतिवेदन दिएका छन्। यद्यपि दुबै टोलीले दोषी किटान गर्न सकेका छैनन्।