कञ्चरनपुरमा फेरी गोली चल्यो, १ जनाको मृत्यु, ५ प्रदर्शनकारी घाइते

कञ्चरनपुर,८ भदौ । बलात्कारपछि हत्या  भएकी  १३ वर्षीय बालिका निर्मला पन्तको घटनालाई लिएर अशान्त बनेको महेन्द्रनगरमा आज पनि गोली चलेको छ। गोलीबाट एक बालकको मृत्यु भएको छ।बिहानदेखि महेन्द्रनगर बजार शान्त रहेको अवस्थामा अपरान्ह अचानक माहोल भड्किएको हो।

नेपाल कम्युनिस्ट पार्टी (नेकपा)का नेता भीम रावलले विवादास्पद अभिव्यक्ति दिएको भन्दै सोको विरुद्ध कञ्चनपुरमा पुनः प्रदर्शन सुरु गरिएको हो।

शुक्रबार बिहान अन्तर्वार्ताका क्रममा नेता रावलले निर्मला पन्तको हत्या प्रकरणलाई कांग्रेसले उग्र बनाइरहेको भन्दै विवादित अभिव्यक्ति दिएका थिए।

उक्त अभिव्यक्तिको विरोधमा नेपाल विद्यार्थी संघले शुक्रबार जिल्ला प्रशासन कार्यालय कञ्चनपुर अगाडि प्रदर्शन गरिरहेका छन्। प्रदर्शनकारीलाई तितरवितर पार्न प्रहरीले एक राउण्ड हवाई फायर र केही सेल अश्रुग्यास प्रहार गरेको जनाएको छ।

प्रहरीको गोली लागेर १ जनाको मृत्यु भएको छ भने ५ जना घाइते भएका छन्।

निर्मला पन्त प्रकरणमा तिन दिनदेखि अशान्त बनेको महेन्द्रनगर सरकारले उच्च स्तरिय छानविन समिति गठन, सिडिओ, एसपी र डिएसपी परिवर्तन गरेसगै आजबाट केही शान्त बनेको थियो। तर दिउँसोबाट फेरी आन्दोलन सुरु भएको हो।