राष्ट्रपति भण्डारीले  संघीय संसद्‌मा आज पहिलोपटक सम्बोधन गर्ने

 

काठमाडौं, चैत १५  । राष्ट्रपति विद्यादेवी भण्डारीले संघीय संसद्को पहिलो बैठकलाई आज सम्बोधन गर्ने भएकी छन्। प्रतिनिधिसभा र राष्ट्रियसभाको निर्वाचनपछि बनेको संघीय संसद्को संयुक्त ऐतिहासिक बैठकलाई दिउँसो ४ बजे राष्ट्रपतिबाट पहिलो सम्बोधन हुन लागेको हो।

नेपालको संविधान जारी भएपछि पहिलोपटक गत मंसिर १० र २१ मा सम्पन्न प्रतिनिधिसभाको निर्वाचन भएको थियो। माघ २४ मा सम्पन्न राष्ट्रियसभाको निर्वाचनबाट गठित ती दुवै सदनको संयुक्त बैठकलाई दोश्रोपटक राष्ट्रपतिमा निर्वाचित भण्डारीले सम्बोधन गर्न लागेकी हुन्।

राष्ट्रपति भण्डारी सम्मेलन केन्द्रमा घोडाको बग्गीमा प्रवेश गर्ने कार्यक्रम रहेको संसद् सचिवालयका प्रवक्ता डा भरतराज गौतमले बताए। प्रधानमन्त्री केपी शर्मा ओली, प्रतिनिधिसभाका सभामुख कृष्णबहादुर महरा, राष्ट्रियसभाका अध्यक्ष गणेश तिमल्सिना, कानुन, न्याय तथा संसदीय मामिला मन्त्री शेरबहादुर तामाङ, प्रतिनिधिसभाका उपसभामुख र राष्ट्रियसभाका उपाध्यक्ष लगायतले राष्ट्रपतिलाई स्वागत गर्नेछन्।

बैठक कक्षमा राष्ट्रपतिले आशन ग्रहण गरेपछि प्रधानमन्त्री ओलीले सम्बोधनको प्रति राष्ट्रपति भण्डारीलाई हस्तान्तरण गर्ने कार्यक्रम छ। सम्बोधनपछि बैठक समाप्त हुने भएकाले अन्य कार्यसूची हुनेछैन।