प्रचण्डले भने, ओली र म नै कार्यकारीमा

चितजन, १३ मंसिर । माओवादी केन्द्रका अध्यक्ष पुष्पमकल दाहाल प्रचण्डले चुनाव परिणामलगत्तै माओवादी र एमालेबीचको एकतापछि एकीकृत पार्टीको अध्यक्ष वा मुलुकको प्रधानमन्त्रीमध्ये एकमा आफू र अर्कोमा केपी शर्मा ओली हुने स्पष्ट पारेका छन् ।
भरतपुरबाट ३० किलोमिटर पश्चिममा पर्ने मेघौलीमा आयोजित कार्यक्रमपछि दिवा खानाका साथ मंगलबार अन्नपूर्णसँगको विशेष कुराकानीमा दाहालले भने, ‘माओवादी र एमालेबीच एकीकृत हुने । एकीकृत पार्टीले पार्टी अध्यक्ष, मुलुकको राष्ट्रपति, उपराष्ट्रपति, प्रधानमन्त्री र सभामुखजस्ता महत्वपूर्ण पदमा सहमतिका साथ भागवण्डा गर्ने वाम गठबन्धन घोषणाका क्रममै भएको सहमतिमा उल्लेख छ ।’
आफू र ओलीले एकीकृत पार्टीपछि के पद पाउने भन्दा पनि सात दशकदेखि जनताले प्रतीक्षा गरेको विभाजित कम्युनिस्टबीचको एकता ठूलो कुरा हुने उनले तर्क गरे ।त्यसैले हामी दुईका लागि पदभन्दा पार्टी एकता ठूलो कुरा हो उनले भने । ‘कुनै न कुनै कार्यकारी पदमा म हुन्छु’, दाहालले हर्षका साथ भने ।
माओवादी र एमालेबीच एकताको उद्देश्य अधिनायकवाद जन्माउने नभएर शान्तिप्रक्रियालाई पूर्णता दिनु र संविधान कार्यान्वयनमा सफलता पाउनु रहेको दाहालको दाबी थियो ।उनले भने, ‘एमाले र माओवादीको एकता अधिनायकवाद जन्माउन नभई मुलुकको शान्ति र स्थायित्वमा केन्द्रित रहन्छ ।
वामपन्थीविरुद्ध जति नै दक्षिणपन्थी दुष्प्रचार भए पनि जनताले स्थानीय, प्रदेश र प्रतिनिधिसभामा वामपन्थीलाई बहुमत दिलाउने जनआवाज आफूले मुलुकभरका चुनाव प्रचारका क्रममा सुनेको दाबी दाहालले गरे ।
आफ्नो चुनावी क्षेत्र यकिन हुन नसक्नुका कारणको जिज्ञासामा दाहालले भने, ‘मुलुकको एकता हो । दस बर्से जनयुद्ध र राजधानीलाई एकाकार गर्न मैले पहिलो संविधानसभामा रोल्पा र काठमाडौं रोजें, शान्ति प्रक्रिया र संविधान निर्माणलाई सफल गराउँदै मधेसलाई राजधानीमा एकाकार गराउन काठमाडौं र सिरहा रोजें भने अहिले राष्ट्रिय एकता आवश्यक भएकोले चितवन आएँ ।’
दश बर्र्से जनयुद्धबाट शान्तिप्रक्रिया हुँदै दुई(दुई पटक सत्ता नेतृत्वमा रहेका दाहालले समाजवादउन्मुख आर्थिक सामाजिक विकासका आधारमा ‘समृद्ध नेपाल विकशित चितवन’ ३० बुँदे प्रतिबद्धतापत्र सार्वजनिक गरेका छन् ।पुत्र प्रकाशको निधनपछि केही समय चुनाव प्रचारमा सुस्तता आए पनि शुक्रबारदेखि दाहालले चुनावी प्रचारलाई तीव्रता दिएका छन् । आजको अन्नपूर्णपोष्टमा खबर छ।