चितवन राष्ट्रिय निकुञ्जले नदी किनारका होटलको अनुगमन गर्ने

राजेन्द्र आचार्य

चितवन, २० भदौ । वन्यजन्तु संरक्षणमा चुनौति थपिएपछि चितवन राष्ट्रिय निकुञ्जले नदी तटीय क्षेत्रका होटलहरुको अनुगमन गर्ने भएको छ ।

14215288_1198661773508959_159902122_o

मेघौली सराइ होटलले छाडेको बिजुलीको तारमा करेन्ट लागेर गत साउन २४ गते एउटा गैंडा मरेपछि निकुञ्जले होटलहरुको अवस्थाबारे अनुगमन गर्ने भएको हो ।

सोमबार निकुञ्जमा आयोजित पत्रकार सम्मेलनमा प्रमुख संरक्षण अधिकृत रामचन्द्र कँडेलले यसैसाता अनुगमन गर्ने जानकारी दिए । उनले भने, ‘हामीले शून्य चोरी शिकारी वर्षसमेत मनाऔं । तर पछिल्लो समयमा गैंडाहरु विविध कारणले मरेका छन् । त्यस्ता घटनालाई रोक्न अनुगमन गर्न लागेका हौं ।’

चितवन राष्ट्रिय निकुञ्जभित्र पर्ने नदी तटीय क्षेत्रमामात्रै २० वटाभन्दा बढी होटलहरु रहेका छन् ।

चितवन राष्ट्रिय निकुञ्जमा गत आर्थिक वर्षमा आपसमा जुधेर, विरामी भएर, कालगती लगायतका बिभिन्न कारणले १४ वटा गैंडा मरेका थिए । हाल ६०५ वटा गैंडाहरु रहेको निकुञ्जले जनाएको छ ।