लाइनको अनियमितताले उद्योग धरासायी बन्दै

 

चितवन, ११ वैशाख । चितवनको औद्योगिक फिडरमा लाइनको अनियमितताले उद्योग सञ्चालक समस्यामा परेका छन् ।NEA

व्यवसायीले आलोपालो गरेर उद्योग चलाउँदासमेत समस्या समाधान नभएपछि उद्योग व्यवसाय नै धरासायी हुने अवस्था आएको व्यवसायीले बताएका छन् ।

भरतपुरको सवस्टेसनदेखि पोखरा बसपार्क हुँदै मङ्गलपुरसम्म रहेका १०५ ठूला उद्योगमा समस्या आएको उनीहरुले बताएका छन् ।
औद्योगिक फिडरमा प्रयोग भएको तारको मोटाइ सानो भएर तीव्र विद्यत् भारका कारण तार चुड्ने र भोल्टेज घटबढ हुने समस्या भएर उद्योगी ठूलो मारमा परेको चितवन प्लास्टिक उद्योग व्यवसायी सङ्घका अध्यक्ष डिल्लीराम सापकोटाले बताए ।

उद्योगको सङ्ख्या बढेसँगै विद्युत् खपत बढ्दै जाने तर विद्युत्को क्षमता नबढेका कारण उद्योग सञ्चालनमा समस्या भएको सापकोटाले बताए ।

औद्योगिक फिडरबाट बिहान ६ देखि साँझ ६ बजेसम्म दैनिक १२ घन्टा निरन्तर विद्युत् दिनुपर्ने भएपनि प्राधिकरणको कमजोरीका कारण दैनिक आठ घन्टा पनि नियमित विद्युत् सञ्चालन हुन सकेको छैन । अध्यक्ष सापकोटाका अनुसार निरन्तर विद्युत् प्रवाह नहुँदा धेरै उद्योगीको उद्योग बन्द गर्नुपर्ने अवस्था सिर्जना भएको छ ।

औद्योगिक फिडर आन्तरिक व्यवस्थापन तथा अनुगमन समितिका संयोजक अरुणकुमार पियाले दैनिक आठ घन्टा विद्युत् आउँदा २६ पटकसम्म बिजुली आउने जाने गरेको र ठूला उद्योगमा पटकपटक लाइन काटिँदा धेरै क्षति हुने गरेको बताउ ।

पटकपटक विद्युत् आपूर्ति अवरुद्ध हुने समस्याका कारण चितवनमा पछिल्लो समय उद्योग चल्ने अवस्थामा नरहेको उनले बताए । चितवनमा औद्योगिक क्षेत्रमा प्रयोग गर्न २ वटा फिडर राखिएका छन् । बराबर क्षमता रहेका फिडरमध्ये १ नम्बरको फिडरअन्तर्गत सात वटा उद्योग र २ नम्बरको फिडरअन्तर्गत १०५ वटा ठूला उद्योग सञ्चालित छन् ।

एक नम्बरको फिडरको लाइन २ नम्बरको फिडरमा जोडी दिन विद्युत्सँग माग गरिएको पियाले बताए । त्यसबापत लाग्ने रु ६० लाख खर्चमध्ये आधा रकम व्यवसायी आफैँले बेहोर्ने भनिए पनि विद्युत् कार्यालयले नमानेको उनले बताए ।

विद्युत् प्राधिकरण भरतपुर वितरण केन्द्रका इन्जिनियर राजेन्द्र पौडेलले व्यवसायीको माग जायज भएकाले कामलाई अगाडि बढाउने बताए ।

Leave a Reply

Your email address will not be published.